國際米蘭教練文仙尼上個禮拜同老闆莫拉堤會晤，傾下季組軍方針，盛傳除十個獲留用嘅球員外，大軍其餘十六人全部被「叮」走。呢份「十人絕密名單」日前突然被公開，唔知係漏風聲抑或係國米高層特登咁做，總之名單無份嘅球員係時候搵定新東家都得囉。
名單上十個人包括阿祖安奴、馬田斯、辛尼迪、史坦高域、華朗、薛馬歷亞、甘比亞素、哥度巴、貝迪素同埋費華利，後者係唯一土炮；換言之，被棄用名將包括高薪球員韋利、列高巴，重有戴維斯、托度、同埋馬達拉斯等。
我求大俠就認為係國米高層特登放風，因為近日唔少其他球會都向佢哋啲球員打主意，例如有傳米杜士堡想斟尹達美迪同埋安利；會方盡快等啲球員知難而退，快啲搵着落，自己又可清瘀血，算係一家便宜兩家着。
諾域治球迷見證生死
諾域治下周日英超聯煞科日作客富咸，球會特別為買唔到飛跟去嘅球迷，喺主場安排銀幕直播；不過另一護級隊水晶宮嘅球迷就無咁好福氣，當日佢哋亦係作客鬥查爾頓，但呢場將會由《天空體育》作電視直播，英超有例規定《天空體育》直播嘅賽事，同一時間唔能夠喺其他地方直播！
「孖寶」識做轉贈雜工
NBA球隊火箭前日解散放暑假前，會向每位球員發放萬五蚊美金嘅獎金，麥基迪將全部獎金捐出嚟慰勞球隊嘅雜役職員；至於上季捐出六千美金嘅姚明今年都疏爽咗，畀咗一萬蚊出嚟打賞職員，但對於年薪過千萬甚至過億港元嘅姚、麥兩人而言，都只係九牛一毛啫。
基拿甸奴標價逾5億
帕爾馬日前首次為射手基拿甸奴叫價三千五百萬鎊（約五億一千萬港元），獅子開大口。佢哋理據係當日賣阿祖安奴都要咁上下，家陣基拿甸奴一樣炙手可熱，價錢企硬。當今肯出呢個價嘅球會寥寥可數，或者咁講，假如帕爾馬護級失敗，到時要賤賣，帕爾馬就唔敢咁狼啦。
AC紅軍着「老嚟」波衫
歐冠盃決賽，AC將會着白衫、利記就着紅衫。話說雖然AC抽中「主場」，但唔知係咪貪兩年前贏祖記捧盃嗰陣着白衫，覺得「老嚟」，於是向當局同利記商討調一調。點知利記亦一口答應，原來紅軍過往四次贏歐冠盃都係着紅衫兼對手着白衫。着咩衫都扭盡六壬，到時一定精采！