自從無綫節目《勁歌金曲》改革後，所有歌手都要唱現場，但𠵱家嘅歌星唱功麻麻，搞到有好多觀眾投訴。噚日何韻詩接受港台節目《娛樂滿天星》主持周國豐嘅電話訪問，周國豐話自從阿詩冇做《勁歌》主持後，節目水準每況愈下，因為阿詩以前同其他歌手jam歌都會有火花，但𠵱家其他歌手明顯唱得差咗。
事後周國豐又同記者講，話近排好多聽眾傳真批評啲歌手喺《勁歌金曲優秀選第一回》嘅crossover環節中唱得難聽，有聽眾重揚言罷睇《勁歌》，重狠評《勁歌》似《殘酷一叮》。周國豐亦認同話：「大家都好笑，但（勁歌）就係可笑囉。個節目設計係ＯＫ，係歌手唔爭氣啫，好似Twins唱歌就有待進步，我亦同Mani（霍汶希）講過，忙唔係藉口嚟。」
而《勁歌》監製陳競游噚日喺電話度回應話：「我唔會嬲，歌手唱得好唔好係唱片公司嘅問題，作為一個媒體真係好被動，總之我哋有畀足夠時間歌手綵排，只係歌手畀期唔夠啫。」
侯佩岑最近拍咗DHC護膚品廣告，同男友周杰倫一樣係香港區代言人。對於俾人話叨男友光至拍到呢個廣告，侯佩岑噚日就好有自信咁話：「我覺得很榮幸，但關係應不大。」佢又話好想拍即食麵廣告，主要係貪佢可以一邊拍一邊食喎。
梁詠琪（GiGi）噚日喺台灣宣傳後日推出嘅新碟《順時針》，工作人員特別準備咗一個十層高嘅蛋糕，慶祝GiGi第十張國語專輯誕生。GiGi為咗籌備新碟，近來經常頭痛兼胃痛，佢以普通話講：「這張新歌加精選是一個階段的記錄，往後的我會帶給大家一個新風貌，也許會唱hiphop或走性感路線。」
張震噚日喺UA時代戲院出席「愛神．《手》映禮」，女主角鞏俐就冇嚟。張震話喺台灣已經同朋友睇咗套戲，睇到鞏俐幫自己手淫嗰場戲時重好尷尬，有女性朋友事後send短訊畀佢，話唔敢同佢講嘢。張震喺片中有露股場面，問佢覺得自己嘅屁股靚唔靚，佢話：「還好啦，算不錯。」
盧巧音、黃家諾同梁藝玲噚日喺黃竹坑拍攝港台劇集《醫學神探》，盧巧音扮演醫生，黃家諾就扮病人。盧巧音表示會定期去做婦科檢查，佢又話：「我曾經患輕度腦炎，我又鍾意滑水，所以懷疑因為個頭撞咗落水度，影響隻眼有事。」
BeeGees成員RobinGibb嚟緊喺香港舉行演唱會。Robin嘅中國區個唱代理人樂仕噚日接受港台訪問，話Robin好欣賞東方廟宇，所以到時會帶佢去大嶼山睇大佛。樂仕重讚Robin平易近人，反而雲妮侯斯頓（WhitneyHouston）就架子十足。
