喺今年二月日本個AOU2005展覽會度，NAMCO曾經擺放過幾部將推出嘅街機賽車Game，不過並非旗下王牌《RidgeRacer》新作，而係CrossOver任天堂，推出街機版孖寶賽車！
記者：徐影龍
遊戲名稱為《MarioKartArcadeGP》，以家用機GC版為藍本開發，入面角色全部都係耳熟能詳嘅可愛人物，好似Mario、Wario、Peach公主等統統都會登場，雖然唔會似《DoubleDash》咁一架車有兩個人，亦唔會掟炸彈攻擊對手，不過速度感及掟彎控制更有賽車Feel，沿途重有金幣畀你執，相比市面一堆「狠辣劈車」Games，相信令人玩得更愉快！
設有鏡頭Cap你個樣
遊戲設有大熱嘅ID卡，像《頭文字D》咁畀用家記錄姓名、往績等資料，暫未知有否更大用途。《MarioKartArcadeGP》最多可供4部機座連線對戰，較為搞鬼係機頂設有一個名為NamCam2嘅鏡頭仔，Capture咗車手個樣後會喺遊戲度出現。雖然以前曾有街機試過咁玩，不過今次重會加入瑪利奧帽、近視眼鏡、皇冠等，放落你個樣度，當超越對手時彈個搞鬼樣出嚟，肯定激死對手！
