末代港督彭定康生性為食，任內留低其中兩個經典鏡頭，一個係飲涼茶，另一個係食蛋撻。當年佢幫襯中環擺花街泰昌餅家食出爐蛋撻，令呢家開業半世紀嘅餅家聲名大噪，但泰昌近日傳出執笠消息，八方向老闆歐陽天閏查詢，佢話因為業主大幅加租，由每個月三萬八蚊加到八萬蚊，但一個蛋撻都係賣幾蚊，點可能頂得住咁貴租？惟有做埋今個月就光榮結業。
歐陽先生又話，天下無不散之筵席，會按勞工法例賠償畀班老夥計，同埋會盡量搵新舖位，希望不久將來可以重新營業，繼續為中環打工仔同街坊製造下午茶不可或缺嘅蛋撻。由於唔少街坊收到風泰昌就快唔做，噚日店外大排長龍，歐陽先生卻話做蛋撻係手作仔，盡量每日最多做到千幾個應市，多多人排隊都係得咁多賣，惟有對向隅者講句唔好意思。
歐陽先生好念舊，話要同幫襯過嘅達官貴人講聲多謝支持，若日後有機會開新舖，希望大家繼續支持。
傳真︰2623-9278
電郵︰[email protected]