如無意外，煲呔曾都會喺五月底暫時劈炮，去選特首。煲呔做人不嬲都精打細算，但為咗做特首都要有小小犧牲，除咗六月冇得𢭃人工、冇咗強積金、司機同醫療福利外，重會蝕埋剩番落嚟嘅廿幾日年假，因為官員自己辭職，剩番嘅假期就全部自動報銷，冇得補錢。
政務司司長一個月人工有三十四萬幾，如果將廿幾日假期兌番錢，都值成廿幾萬。不過小財唔出、大財唔入，煲呔做咗特首，相信就會加人工加福利，到時乜都賺番晒啦！
講開選特首，社福界目前重未聯絡到煲呔，但噚日業界幾個選委同金勞詹食飯。金勞詹同八方講，佢哋去咗九龍酒店，但為避嫌疑，大家就夾錢食，每人食咗幾百蚊，佢喺會上冇拉票、冇講政綱，淨係聽吓佢哋講個民調點做，因為佢要等五月十七號宣布後，先至會去爭取提名。
傳真︰2623-9278
電郵︰[email protected]