有上市公司晨早喺冇雷公咁遠嘅地方搞股東會，博小股東唔出席，但亦有上市公司精心安排節目，誠邀小股東參與。噚日銅鑼灣大業主希慎興業舉行股東周年大會，一早就向所有小股東發出邀請函，請佢哋早到一粒鐘，出席「參觀希慎銅鑼灣物業」活動。
希慎嘅公關大員講，活動目的係等小股東對集團業務運作多啲了解，結果反應踴躍，有成百幾個股東回覆話想參與，但名額有限，所以先到先得，落空嘅小股東，希慎惟有送番個小收音機作補償。至於有份參加嘅四十名股東，就參觀咗利園嘅控制室、LV喺利園新店嘅液晶螢幕等，紀念品就係一個靚靚「IloveCWB」布袋（圖）。
至於股東會嘅場地亦有心思，就喺利園二期一家餐廳，話貪嗰度有個露天平台，開完會可以喺嗰度享用午餐，可惜天不造美，要移師室內，不過冇影響股東食嘢嘅興致，而希慎亦喺原先預備嘅紀念袋內送多把希慎遮，真體貼。
傳真︰2623-9278
電郵︰[email protected]