老董臨落台，由於陳太嘅陰影，恐懼政務司司長功高震主，將當奴升上神枱，架空埋，並叫佢做清潔大隊長，叫佢揸把掃把掃街！
政務司司長變咗「真冇權」，叫兩司十一局，直接report畀特首，以為咁就可以實施「強勢行政主導」！點知高官問責，愈問愈冇責，以前殖民地政府，布政司係大內總管，強力統籌協調各部門合作，老董想學朱元璋，廢宰相，中央集權，又唔知自己優柔寡斷、樣樣嘢拖住唔批，各部門阿頭見到咁，就各自為政，政務司司長揸咗掃把，老董亦逐步隱形，各個部門山頭，各個政務官阿頭，都做咗特首！
例如尖沙嘴巴士總站大搬遷，話要開闢一個「羅馬廣場」，事關重大，因為交通大兜亂，隨時搞到半個九龍大塞車！因為將來可以進入呢個自稱係「羅馬」、實際上係菲傭文娛中心嘅「廣場」嘅巴士線，大幅削減，搭天星小輪嘅上到岸，要行到冇雷公咁遠至有巴士接駁，八成路人反對咁嘅擾民惡政！
尖沙嘴巴士總站，又係香港所謂「地標」，地標都拆埋，咁重大嘅決定，竟然由旅遊專員一人拍板決定，運輸署只係諗吓點樣搬巴士站，建築署就諗緊點樣「超意大利趕羅馬」，起掂個菲傭第二廣場，獨係冇人最高統籌，由全局着眼，望一望北京道、彌敦道、柯士甸道，呢一大嚿，睇吓將來交通大改道，雙程變單程，啲旅遊巴同巴士塞晒喺文化中心門口嘅樽頸，入唔入得，出唔出得，見到一場交通災難，會拍枱大喝下面班飯桶收手！
呢啲就係老董留低嘅蘇州屎！當奴揸掃把，等於冇咗個政務司司長，各個部門，包括旅遊專員，自己都係一個政務司司長，企喺張地圖面前，指指點點，咁就可以令半個九龍變色！
立法會議員今日就會批准撥款，通過起呢個「偽羅馬廣場」兼搬巴士總站嘞！不過到今時今日，連個圖則都冇喎！點樣「羅馬」法，完全一嚿雲！當奴又度緊點樣競「選」，冇王管，尖沙嘴大災難，就在眼前，難為成班議員，「歡送」阿董，歌功頌德，同佢度身設計離任之後種種特權着數大優惠，請問尖沙嘴呢個交通炸彈，佢係咪應該搬走？
傳真︰2623-9278
電郵︰[email protected]