左丁山曾經擁有新款３Ｇ手機，點知搭的士時，竟然遺漏咗，冇心機買番架新嘅，於是繼續使用已成老餅嘅三年前新款２Ｇ手機。幾位老友曾收到老婆嘅生日禮物——新款３Ｇ，都係收埋唔用，詐詐諦話３Ｇ太複雜，唔識用。其實就係人人都唔想向老婆現場報道自己身在何處。
原來現場報道有特別用處。記唔記得○三年三、四月，沙士高峯期，沙士病人或懷疑患上沙士嘅病人，一概住在隔離病房，唔准探病，家屬不知親人病情如何，十分焦急。後來電訊商（好似係和記環球電訊）義助醫管局，推出視像電話服務，病人可以透過電話，與親屬交談，等病人睇到佢嘅實況。
小Ｃ之家人上星期患病，咳嗽與發燒齊來，於是去公立醫院睇門診，𠵱家公立醫院嚴防大陸流感傳入香港，守龍門守得好緊，一見小Ｃ之家人又咳又發燒，立即送咗佢入醫院嘅隔離病房。小Ｃ與家人一時之間，措手不及，不知如何是好。次日，小Ｃ去探病，被拒入內，只好打電話，聽到家人（老人家）幾徬徨喎，小Ｃ於是向表姐請教有乜辦法。表姐諗起沙士時期嘅視像電話，於是佢叫試吓。唉吔，一問之下，要「卜」期，等足三日。到咗呢個時候，就諗起個世界上有３Ｇ電話呢回事，３Ｇ就係與隔離病房內嘅病人溝通嘅最好夥伴。
麻煩就係，老人家唔識新玩意，透過醫護人員送３Ｇ入到去病房，老人家都未必識用。小Ｃ表姐話：「睇怕母親節之最佳禮物就係送部３Ｇ機畀阿媽，教曉佢如何用機，平時可以打電話返屋企睇吓佢，萬一有事起嚟，就可以有更好用途。」
呢個主意幾好，啲老公收到老婆送嘅３Ｇ，不如轉送畀家中父母，以備不時之需。