鍾欣桐（阿嬌）、鄧麗欣（Stephy）和官恩娜等人昨日到都會海逸商場出席新城「聯fanBARcode」記者會，阿嬌和Stephy兩位緋聞情敵同場玩遊戲，但未見二人有傾談，在後台分別接受訪問時，更異常避忌，阿嬌的助手刻意站在Stephy前面遮擋，以免拍到阿嬌跟Stephy的合照。
事後問阿嬌可有跟Stephy打招呼，她說：「我同佢喺後台有打招呼，但係冇傾偈，都唔知講乜，總之唔會尷尬。」至於Stephy同樣表示不會感到尷尬，她說：「喺ＴＶＢ都見過，唔係第一次，大家都知係啲新聞，因為唔熟，平時見面都會打招呼。」
而緋聞男主角方力申（Alex）昨日則往大嶼山出席佛教活動，原本活動通告有Stephy，但遲遲未見伊人，其後經理人公司表示Stephy並未有應承出席。問Alex其緋聞女友Stephy會不會來？Alex謂：「吓？我唔知呀，我淨係知有我份咋。」
問Alex會否去看Twins稍後與at17合作的音樂會？Alex說：「唔知喎，睇吓有冇時間先啦，不過我哋（指與阿嬌）有時必須出席同一個活動時，都係咁俾人影，呢啲唔係一定要出席嘅，都係唔好去。」
採訪：馮美茵、胡比
攝影：陳慧安、仇志德
