主演電影《BＪ單身日記》同《芝加哥》嘅金像女星雲妮絲惠嘉（ReneeZellweger），自從九個月前同搖滾樂隊WhiteStripes主音JackWhite分手後，傳過佢同愛爾蘭創作歌手DamienRice拍拖。不過雲妮前日忽然透過發言人宣布，佢已經喺前日同三十七歲嘅鄉謠界巨星KennyChesney喺鄰近加勒比海嘅處女島結婚，消息震驚整個荷李活。
上月尾啱啱度過三十六歲生日嘅雲妮，一向對音樂人情有獨鍾，今年一月初為南亞海嘯籌款嘅演唱會上邂逅Kenny之後，佢哋就開始秘密拍拖。上星期六Kenny喺佛羅里達州表演完後，佢用私人飛機載住雲妮去處女島共度周末，點知兩個興之所至，即時決定喺周一結婚。
據目擊者所講，當日雲妮同Kenny只係請咗約四十五位密友出席婚禮，着住CarolinaHerrera婚紗嘅雲妮，喺女牧師見證之下同赤腳嘅Kenny齊齊講「我願意」，一對新人喺短短十五分鐘嘅儀式上又喊又笑，情緒激動，之後雲妮同Kenny到一間海鮮食肆大事慶祝，氣氛熱鬧。
講開又講，原來新郎哥Kenny自從喺九七年睇完電影《甜心先生》之後已經好冧雲妮，重讚佢係世上最性感嘅女人，估唔到Kenny八年後終於娶得美人歸。另外，雖然雲妮同Kenny剛剛結婚，但Kenny聽日又要去阿肯色州表演，所以暫時未有時間度蜜月喇！