八方最近寫AO引起好多回應，有人提供徐家祥背景，有人又話第一女AO唔係陳方安生而係周雪凝，最新又收到劉讀者遠方來函，話首位AO，應該係鄭棟材。佢五八年做徙置事務處處長，係第一個華人部門首長，之後升任華民政務司，直至六三年徐家祥至接佢個位。
關於鄭棟材，八方覺得值得一寫。皆因中文大學英語教學事件，上周又因彭玉榮失言而起風波。鄭棟材點解六三年唔做官呢？就係因為中大成立，佢去咗做聯合書院校長。四十年前，中大就中文同英文嘅爭論已經展開，鄭棟材係主角之一。中大學生好應該搵番當時啲料睇睇。
講開又講，鄭棟材都算威，起碼中大有棟鄭棟材樓。能獲大學建築物冠名紀念嘅AO，可能得佢一個。你估下一個會唔會係煲呔呢？如果有棟蔭權樓，咁就光宗耀祖囉。
傳真︰2623-9278
電郵︰[email protected]