停牌多時的世紀建業（079），噚日終於復牌，並公布訂立期權協議，以收購澳門假日酒店連賭廳，但外界反應似乎麻麻地，一開市就插，股價最低見過0.275元，收0.29元，大跌29.27％，成交股數高達2.64億股，金額7910萬元。
經紀陳話，家陣澳門賭業股確係冇咁好炒，除咗龍頭新濠國際（200）及家姐嘅信德（242）之外，好多濠賭股股價都幾乎停滯不前。世紀建業停牌前炒得好勁，有唔少炒家落場炒賣，但因為停牌停得耐，所以好多孖展倉都係一開市就被斬倉沽貨，加上賭仔對澳門假日酒店個場評價一般，所以世紀建業復牌急跌，好多人都唔意外。
另一隻比較矚目的股份，就係益華國際（370），隻股昨日最低見0.285元，收0.305元，跌7.78％。益華自從投身焦煤行業兼且有基金入股後，股價最高見過0.395元。經紀陳話，隻股急跌，因市傳有位益華前主要股東沽貨，聞說佢現時重揸住唔少貨。
慕容小初