鍾意睇戲打機嘅朋友，將屋企裝修到成個私人影院咁重唔High到暈？Pierre屋企最大賣點就係有個100吋投射螢幕，睇戲玩Game夠晒逼真，至正斗係造價只需約一萬蚊！而為咗增加獨特燈光效果，全屋只用白燈同藍燈，但最估佢唔到嘅係，走廊竟然放咗部洗衣機！
記者：梁彩燕 攝影：陳盛臣
設計公司：AXIS01InteriorCompany（82005679）
一萬蚊至高享受
「平時放假最多就係叫啲朋友上嚟玩，做個100吋ProjectorScreen就至啱同朋友圍埋一齊睇電影玩Game！客廳放埋張大大哋、可以攤平嘅L形摺合式梳化，多幾個朋友到訪都唔覺逼狹。」Pierre一邊踢住波（打機）一邊講，太太Christine就邊玩貓邊點頭認同。入門首先見大廳，有着一般家居嘅舒適感，但當拉下簾幕遮掩露台、放下100吋投射螢幕，即變成影院區域，難怪屋主口吻透露出一點點自豪感。而電視圍身及燈槽，連工包料費用只需約一萬蚊左右，絕對抵玩！
訂做透光鵝蛋櫃
而飯廳至搶眼係飾櫃對下嘅鵝蛋形燈槽，起初唔講真係以為有甚麼特別機關裝置！原來都係想加點燈光效果，遂搵師傅上門度位訂做，成個櫃主要以胡桃木製，上層間隔專放大型擺設，中層鵝蛋燈框內滲出淡淡藍光，效果特別，最下層當然作儲物櫃用。咪齋睇相以為屋主唔多擺設，其實雜物房內高達玩意已經堆得水洩不通！將全部DisplayShow晒出來，絕非三兩下手勢就搞得掂！唯一可先決定嘅，係做多幾個櫃，以備日後擺放玩具。
獨特彩藍燈效
客飯廳間隔咁闊落，為免書房門顯得「小家」，𠵱家就以兩座大櫃及雙掩門代替原有嘅間隔牆，同時作為客飯廳嘅Extension，關上門外貌讓人覺得有點宏偉，又帶點神秘感。而大門兩旁嘅藍燈柱，與電視牆嘅燈槽及飯廳鵝蛋燈嚟一招相互呼應，全屋氣氛自然而生。
洗衣機隱身走廊
全屋最多蹺妙處可謂走廊位，半身鏡木櫃其實係入咗牆可作儲物之用，此點應該較容易猜到，但可有想過原來假天花上乃儲物格，最奇怪係點解冇櫃門？唏，櫃門在隔籬廚房頂！都幾搞鬼！另一騎呢點，係竟然入牆櫃內有洗衣機！係，你冇睇錯，係放咗洗衣機！咁點去水？答案原來係將條去水喉直接駁去主人房洗手間浴缸！
不甘四平八穩
近年家居潮流已經唔再Buy那套四平八穩或大大座的裝修擺設，反而集合各種幾何形狀或圓角設計就大行其道，除了形象圓滑點切合現今潮流外，同時亦具備實用價值，至適合家中有小童嘅家庭。
地區：跑馬地
面積：1,300呎
間隔：3房2廳
設計連工程費：$300,000
家具費：$100,000
