今年十一月上映嘅《哈利波特火盃的考驗》大受fans期待，哈仔今次唔止要面對邪惡力量挑戰，佢重開始為約會異性而煩惱，喺率先曝光嘅片段入面，就見到哈仔喺舞會上同唔同嘅女仔跳舞，重跳到神魂顛倒。
《哈利波特火盃的考驗》由已經十五歲嘅丹尼爾拉德克利夫（DanielRadcliffe）繼續飾演哈仔，佢將會被挑選參與著名嘅巫師大賽，挑戰嚟自霍格華茲同兩大歐陸巫師學校嘅高材生。佢喺片中會打個煲呔同着老西，官仔骨骨咁出現喺一個舞會上，同好迷人嘅女角芭蒂芭提齊齊喺舞池上跳舞，深受在場人士注目，哈仔亦被佢搞到目不轉睛兼神魂顛倒。唔知哈仔啲女fans睇完呢段片，會唔會又呷晒醋上網大鬧哈仔嘅舞伴呢？
雖然喺片段入面重未見到哈仔嘅初戀女友張秋，但哈仔亦會除咗西裝褸，同佢老友妙麗跳番隻舞。不過妙麗當然冇同哈仔觸電，反而同嚟自保加利亞魁地奇嘅高大選手跳舞嗰陣，表現得更加投入，佢兩個重會喺今集共墮愛河㖭！
喺談情說愛之外，邪惡嘅佛地魔終於喺今集現身，佢嘅支持者會喺魁地奇大賽中發出信號，預示佛地魔黑暗力量將再次重臨，令魔法世界陷於一片惶恐之中。