媽咪喺母親節最鍾意嘅節目係飲茶，唔好以為蘭西隨口噏，係有根有據㗎。信和旗下大角嘴奧海城商場推廣部，母親節當日，喺商場內訪問咗二百個媽咪，得出呢個答案。
年齡喺五十一歲或以上嘅媽咪，四成八選擇飲茶，其次係食晚飯；而三十一至五十歲嘅比例都係飲茶多啲；只有二十至三十歲嘅媽咪，揀食晚飯多過飲茶。
奧海城商場飲食業，喺本月七同八號嘅營業額，比舊年同期增加兩成半，零售業只得一成二，利寶閣酒家重多出五成三㖭。
另外，屯門市廣場飲食業租戶，營業額增幅有一成半至兩成，零售業係一成。尖沙嘴中港城飲食業多咗一成半生意，零售業則增加一成。
信和又指出，旗下十個商場嘅平均人流，錄得一成二增長。
唔知係咪商場之間競爭好激烈，𠵱家大業主喺假期過後，都會即刻公布商場人流，以及商戶營業額增幅，務求提高透明度。
恒基近年重頭作之一西灣河嘉亨灣，重有唔夠半年就入伙。樓盤現場嘅示範單位同售樓處早就拆咗，聽聞，恒基已經靜雞雞喺以前中環環球大廈七樓總部，搭建緊嘉亨灣新示範單位，準備新一輪促銷攻勢。
聽市場人士講，個盤重有成六百幾個單位未賣，近排港島區又冇乜新樓同佢競爭，好似話等個示範單位整好，就再開賣，快則今個禮拜六，趕起就開放畀市民睇。
恒基自從將總部搬咗去國際金融中心二期後，環球大廈舊址，就未見有乜計劃，今次用嚟做自己樓盤示範單位，買家睇樓，就寧舍方便。
香港地唔通真係好多瘋狂電視迷？點解咁講，睇吓新地SignatureHomes中半山帝景園升級翻新工程就知嘞。用色以棕色與白色為主，重點喺每個單位浴室鏡內，加裝十五吋液晶顯示屏電視，兼且配備遙控及環迴立體音響系統。
另外，連廚房都裝番部十點四吋液晶顯示屏電視。工程完成後，單位周圍都有電視，咁樣行開行埋，都唔怕錯過想睇嘅節目。
SignatureHomes趙靖詩話，帝景園𠵱家呎租逾四十，估計可以提高兩成以上。
帝景園單位一千九百六至最大六千七百呎，咁計，新租每月就最少多萬六蚊，由公司畀租就冇乜所謂，若果唔係，真係要超級電視迷至捨得租嘞。
青衣樓價喺三月下旬至四月期間急升，銀行估價跟唔貼，結果近期灝景灣同盈翠半島，唔少成交出現「唔到價」情況。利記余國忠話，一般低成交價三至五巴仙。好彩買家以換樓客居多，有足夠資金應付。
灝景灣七座中層D，成交價三百九十九萬，銀行估價係三百九十五萬，買家要貼四萬至上到會。五座中層H，成交價五百二十九萬，銀行只估到五百萬左右，算係差幅較大嘅一宗。
余國忠預計，下個月，當銀行有多啲成交數據參考後，預料兩屋苑估價會貼近番成交價。
電郵地址：[email protected]
