天意示警，突然大暴雨，重吹起一陣怪風，新界西北，有人目睹，一股龍捲風，平地而起，簡直有如妖魅！
香港嘅天象，近年來有蒼天講嘢嘅訊息，以下事件，記憶猶新：一、「回歸」前夕，大陸某地贈送「回歸寶鼎」一隻，運輸時跌崩一隻腳，跟住香港「回歸」之後，經濟果然崩潰！
二、一九九七年農曆新年，花車巡遊，當場撞死英國女遊客一名，跟住廢董上台，果然清除前「港英」留下嘅制度，一概當係地雷，結果死嘅唔係外籍女遊客，而係香港！
三、一九九七年七月一日午夜，主權移交，解放軍入城之際，雷風暴雨、烏天黑地，收尾香港變成點，人人有眼見！
四、今年年初四林村許願樹，掛到成身「寶牒」，結果「虛」不受「寶」，成棵倒塌！冇幾耐之後，廢董應聲落台！
四大不祥天象在前，今次又龍捲風、又冧貨櫃，點睇？
龍捲風呢，就未必係衰喎！「龍」者，帝皇之兆，「捲風」者，亦即風捲殘雲之狀，曾蔭權爵士上場，真龍天子登基，呢一樣好易解到畫！龍捲風在西北方位，香港嘅西北方係歐洲同英國，即是話曾爵士上台之後，將會得歐洲及英國大力襄助支持，個天希望佢好似捲風一樣，將行政會議殘董餘孽班底，一次過大清場！
至於貨櫃冧檔，貨櫃係航運嘅產物，貨櫃冧，即是做航運嘅阿董，今年運程可能有少少濕滯！貨櫃點解會冧？堆得高，先至會吹冧，廢董做咗「國家領導人」，位高勢危，喺上海，又得江太祖力撐，圈咗咁多靚地，唔通會出事？
唔怪得佢上又「擸」，下又攞，要特區政府成立一個特首退任之後嘅特權享受研究委員會，研究吓美國總統退休之後，有乜優厚福利享受，好等仔女都係美國人嘅佢，一致睇齊咯！
爆料熱線：29290000、27860099
報料傳真：26239278
報料電郵：[email protected]