車路士雖貴為應屆英超聯冠軍，但並唔係個個都鍾意佢哋，其中科巴姆嘅村民重話到明，唔歡迎佢哋班球星搬入嚟住。
車仔嗰個耗資約二億九千萬港元、位於薩里郡科巴姆嘅練習場喺舊年十二月啟用，泰利、洛賓同杜夫等八個球星為咗方便平日練波，就喺附近買屋。成班有錢佬喺度住，科巴姆啲樓價升硬，班村民定發個豬頭，但佢哋並唔係咁諗。
怕傳統小屋從此消失
當地嘅歷史學家泰萊咁話：「班村民諗起班球星啲超級跑車已經覺得煩，事關唔止嘈，重對環境帶來污染；另外，佢哋亦擔心科巴姆會成為建築商發展嘅目標，起埋一幢二幢新型嘅獨立平房，令一啲傳統嘅小屋從此消失。」
我求大俠認為凡事應該以和為貴，既然係咁，不如車仔班主阿巴莫域治攞錢出嚟，喺練習場加建宿舍，等啲球員有個落腳嘅地方，無謂犯眾憎吖！
3升班馬冇擴軍都留級
德甲今屆三支升班馬比勒費爾德、緬恩斯同紐倫堡都成功護級，下屆可以繼續留喺度，係各地主要聯賽少有嘅現象。對佢哋三隊嘅球迷嚟講，肯定係天大嘅喜訊，但我求大俠認為對德國足球卻係災難。點解？呢三支升班馬都冇乜點擴軍，但都可以留級，證明德甲嘅水準正下降緊囉！
盧卡利尼入埋唔夠輸
季尾意甲波多「蠱惑」，其中利禾奴「派米」，連續輸畀帕爾馬同錫耶納，兩場失十二球真誇張，難怪博彩公司早就避之則吉。隊波唔掂但射手掂，盧卡利尼近兩場入六球，以廿二球同基拿甸奴並列榜首，佢話寧願用六個入球交換，都唔想隊波輸得咁難睇。係咪真嗰句先？
阿根廷幫成眾矢之的
哥連泰斯以一比五輸畀聖保羅，踢三場聯賽得一分，球迷賽後想衝入場打阿根廷籍教練巴薩里拉，多得警方保護佢至甩身。哥隊以佢掌帥、前鋒泰維斯為核心，已觸發球迷反阿根廷力量，巴薩里拉話佢縱橫球壇三十幾年，不怕風雨，至怕佢喺哥連泰斯嘅日子開始倒數。
「大狗」識守馬刺有運行
噚日馬刺主場大炒超音速，除咗因為客軍嘅阿倫同雷文奴域傷出，後備兵爭氣亦係原因；其中「大狗」格連羅賓遜應記首功。事關佢以往只識進攻，點知嚟到馬刺連防守都好咗。好似噚日攞十六分，重兩次博到人進攻犯規；馬刺連「大狗」都可以教到搏老命防守，難怪成為大熱。