好多人都試過將屋企部電腦，駁落大電視度，希望可以安坐喺客廳梳化，舒舒服服咁欣賞喺網上下載返嚟嘅多媒體檔案，可惜唔係大綑駁線礙眼，就係設定同效果差強人意！Pinnacle就新推出咗一款ShowCenter200，將電腦變身成最強嘅影音中心，以802.11g無線傳到客廳大電視，喺網上下載返嚟嘅電影預告片，都可喺客廳個大電視度播番出嚟啦！
記者：許福合 攝影：劉耀祥、許福合
ImageGirl：Yuki
Pinnacle呢個品牌對AV玩家可能唔太熟悉，不過有留意TV-Tuner一類產品嘅砌機友，就應知道係好嘢，TV-Tuner種類有好多，而Pinnacle推出嘅產品就以畫面清、功能多見稱，而且同其他軟硬件相衝嘅機會都好少。今次Pinnacle推出嘅ShowCenter200，就可以話將電腦功能向電視出手，好多以往只能由錄影機、DVD機分擔嘅功能，都可由電腦一手包辦。
PROFILE
輸出：色差、S-Video、Lineout、RCA、光纖
網絡：802.11g及RJ-45
音效格式：MP3/MP3/WMA/WAV
影片格式：MPEG1/2/4/AVI/Xvid/VOB/WMV
影像格式：JPG/BMP/PNG/GIF
體積：300×230×40mm
重量：2.4kg
MPEG4
拉出電視睇
呢部ShowCenter200外形好似寬頻路由器咁款，起初對佢有咩功能真係一頭霧水，經過一輪研究，原來原理都好簡單；ShowCenter200唔係用嚟駁電腦，睇佢機背就可以見到有晒色差等駁電視用嘅插頭，而機身上重有條天線，可經802.11g與電腦聯繫，只要電腦方面設定妥當，即使電腦喺房，電視喺廳，都可以喺電視直接「扯」電腦內嘅多媒體檔案嚟睇，而支援格式都好大路，影片可以支援MPEG1/2/4、VOB、AVI、XviD同WM9，唔睇片亦可以聽歌，MP3、WMA同WAV都可以聽，即使受版權保護嘅DRM檔案都一樣可照播。要換吓口味，連相片都可以撈埋，睇相板面亦唔少得必備Thumbnails設計，而相片喺電視睇似乎變得更靚，顏色更Sharp，原來ShowCenter喺背後做過優化工夫，當埋電子相簿咁玩都得！
定時預校錄影
ShowCenter200可經LANcable或無線網絡接駁電腦，不過想方便一啲，尤其係電視同廳相隔比較遠，無線就梗係好用得多，而跟隨ShowCenter200重有個遙控掣，用來指示ShowCenter要喺電腦拉邊套戲過來睇，由於使用咗802.11g制式，傳速可達54Mbps，實際操作時無論反應同傳送速度都好爽快，基本上唔使點等，就好似用緊部錄影機、影碟機一樣「即時」就有反應。不過講到呢度，就要留意，如果要錄影電視，電腦定要具備接收電視功能，所以TV-Tuner就係必須，配合軟件支援，用家即使人在大廳，都可以直接下指示要電腦開始錄影，亦可以預校時間錄影，同一般錄影機功能無大分別，而且電腦硬碟容量一般都好大，閒閒哋錄幾日都無問題，最正係具備Time-Shifting功能，即使未錄影完，已經可以即時睇番，比用錄影機還要方便。
直駁DC睇相
用上個54Mbps高速網絡傳送，除咗令到操作反應較快外，亦令到睇片可以原汁原味，唔會窒吓窒吓，即使睇高容量MPEG2VOB檔，亦可應付得來，絕對無「臨時刪剪」嘅感覺，而且對即將來臨嘅HDTV年代，亦已經做好預備，支援720p/1080i制式，即使高解像電視亦一樣可照播！現場試玩，基本上唔講無人會發現拖緊電腦睇片，流暢度唔錯，據廠方表示，100米左右接收都唔會有問題，香港用好適合。ShowCenter200重有個玩法，機身前設有USB插頭可即時接駁DC睇相，咁就唔使屈喺個細芒睇得咁辛苦！
SHOOTINGTECHNOLOGIES
查詢電話：29596226
同場加映：內、外置TV卡畀你揀
要完全發揮ShowCenter200嘅互動性能，令電腦能即時進行錄影工作，以接收電視節目嘅TV卡（TV-Tuner）自然唔少得。同場就介紹多2款Pinnacle自家推出嘅TV-Tuner畀大家，喺配搭ShowCenter200兼容性方面較令人有信心！
內置式：MediaCenter110i
PCTVMediaCenter110i專為桌面電腦而設計，使用內置式PCI介面，具備接收電視、FM收音及錄影功能，跟機會有齊遙控器同支援軟件，大為簡化電腦嘅操作，幾個掣就可以播放、錄影。內置式唯一缺點係需打開機箱安裝，對新手嚟講算幾有難度。
外置式：MediaCenter100e毋須駁電
若然懶得打開機箱或你正用緊部Notebook，100e就更適合你，用上外置式設計，透過USB2.0介面接駁電腦，體積相當之小巧，同個煙盒差唔多，功能跟110i相近，最正係外置都唔使另駁火牛，全由USB取電，Notebook用就最啱。
