恒指升51點，埋單14085，守住萬四以上。長實（001）與和黃（013）今日分別除息1.42元與1.22元，假如今日實際唔升唔跌，而其他藍籌亦冇郁，則長和將總共拖低恒指27點，即理論上恒指落到14058，仍然守住萬四點，心理上對個市好啲。
中石化C輪3862：上周五晚美國油價靠穩，3大油股都升，中海油（883）最醒，升幅2.3%，中海油C輪3622同4580，升幅達30%，冇乜成交，好難搵食。
搵石化C輪炒，升咗上去嘅唔多買得落手，揀落後者比較安全。中石化（386）升1.6%，熱門C輪3862收17.2仙，反跌1格，短炒就揀呢隻。3862喺9月底夠鐘，溢價4.7%，槓桿率18.2倍（有效8.9倍）引伸波幅26%。的確，隻輪溢價唔算吸引，但壽命長，唔使計較得太緊要，博正股向上移動三五格，揸3862三茶兩飯已經有着落。唔對路，買賣易，跳車都方便啲。要揀數據更靚嘅，有4561，不過交投冇得比。
滙控C輪4766：滙控C輪揀8月到期嘅，昨日講咗向3821埋手，買更長期者，則揀4766。咪當滙控（005）蝸牛上樹，爬得唔快，但有大把時間畀佢爬，幾個禮拜爬高幾蚊，4766就可以帶來魚翅撈飯。滙控昨日不動，隻輪跌1仙，收0.62元，上車係時候。
章盛