相信年過30嘅動漫畫迷，當年都曾被一套《哥布拉》所迷倒，主角永遠打不死，兼且重有大堆美女圍住氹氹轉，學生哥點可以抗拒呢種Fantasy呢？相隔二十幾年，哥布拉重臨，以街機槍Game姿態復活，一眾玩家又可再次決戰水晶人啦！
記者：徐影龍
哥布拉新Game定名為《COBRATHEARCADE》，日本剛於五月頭進行過街頭測試，反應相當之熱烈，好多人都懷念識得「轉彎」嘅魔幻槍，敵人點走都射得中，而且街機版重現「一槍𡁻幾件」嘅爽快感，比起嚟嚟去去真槍射擊Game更有創意。每次清關後，均有動畫襯托作交代劇情之用，除咗宿敵水晶人不時出現外，當然唔少得大堆美女出場幫玩家打氣！
由於魔幻槍實在太厲害，識轉彎又一槍打幾個，所以遊戲內嘅敵人數目及HP亦會較高，若判斷錯誤，好可能被排山倒海嘅敵人瘋狂圍攻！街機支援二人合作模式，跟《TimeCrisis3》一樣，兩者畫面及所望嘅視點均有所不同，大家需不時兼顧左右兩邊敵人，愈有默契就愈有勝機。預計暑假前有機會引入香港機舖，每局約$8，Fans要昅實喇。
相關網址：www.namco.co.jp/aa/am/vg/cobra/
