組合BeeGees喺三十幾年前嚟過香港後，嚟緊佢哋三兄弟之一嘅RobinGibb會再踏足香港，喺會展搞演唱會。佢此行除咗開騷之外，重想開拓亞洲市場，籌備喺八月到北京同上海開個唱，八月二十同二十一日就喺吉隆坡開，同時再推出新碟。
不過最令人期待嘅，係RobinGibb有可能同我哋嘅香港歌手容祖兒（Joey）合作，形式重未定，但應該都離唔開合唱或者一齊出唱片。中西兩代男女歌手合唱，唔知效果係點，但起碼叫做為樂壇加入啲新嘢，唔使咁悶。
Joey噚日透過經理人Mani話覺得好開心好榮幸，有機會同RobinGibb呢位音樂大師合作，佢知道Robin稍後會嚟香港開演唱會，亦有唱片嘅嘢搞緊，對方已經接觸咗英皇，希望雙方可以合作到，Joey重話自己平日都有聽Robin嘅歌㗎。
陳慧琳（Kelly）噚日喺台灣出席洗髮水廣告嘅宣傳活動，問佢幾時先同拍拖十二年嘅男友結婚，Kelly用國語話：「如果男友求婚我會馬上答應，但要四年之後才結婚，交往這麼久不能再拖他了，如果他一直沒求婚，我打算三十八歲問他何時娶我，好在四十歲之前生小孩。」
周渝民（仔仔）原本喺台灣中國技術院就讀，但因為要應付娛樂圈繁重嘅工作，所以成日走堂，後來佢轉咗去醒吾技術學院夜間部就讀，但都同樣因為缺課被校方扣考，佢下個月可能畢唔到業。加上仔仔又冇去學校本月一日嘅「迎新送舊」活動，而且校方一早講過唔去就會記小過。
𠵱家係美國嘅第二十六屆亞太裔傳統月，紐約市有唔少慶祝活動，前日亞太裔美國人聯盟就喺曼哈頓聯合廣場舉辦大型慶典，李連杰同摩根費曼（MorganFreeman）主演嘅動作電影《不死狗》就嚟喺美國公映，所以佢兩個特別現身活動，順便幫新片造勢，而大會為咗表揚李連杰熱心公益嘅精神，重安排摩根頒獎畀佢。
