趙飛雲呢排運氣始終差少少，上周六同老友入場睇皇太后盃。趙飛雲對皇太后盃特別有感情，當年女見習生簡慧榆騎「同興旺」奪標，帶挈贏唔少錢，可惜伊人戰死沙場，令人傷痛。
今屆睇好「土星」及「驕陽」，買咗連贏及位置Q，另左秤右秤之下，覺得榮公子呢排夠霸氣，結果買咗「驕陽」獨贏。「土星」由頭放到尾，睇直路走勢「驕陽」應該冇Win都有Q，但竟然差條鼻毛（馬會網頁公布兩駒跑出時間一樣）追唔到大冷馬「百勝駒」，飲恨第三，令趙飛雲贏少好多，跟住重要被老友窒，話市民對榮公子怨氣重，難免有阻滯，只要睇吓近排中信泰富（267）股價就知啦！
趙飛雲雖然唔係好贊同老友嘅講法，但近年就有一個強烈感覺，香港班大富豪做生意賺到好盡，連公眾形象亦不理，同以往作風有很大分別，加上有政客從中挑撥，引致社會階層對立更加尖銳，這當然亦和董政權時代，港府威信掃地有關，希望新特首上任後，有足夠牙力擺平各方，否則香港會愈來愈分化。
港股昨日乏善足陳，恒指午市在期指帶動下，上升51點，收14085。
早前企錯邊，沒有在恒指突破13600時追入買貨及造好，現水平高追隨時會中伏。所謂有大智慧不如乘勢，勤力做功課揀股固然重要，但更重要是捕捉到一個升浪或跌浪，其實散戶不必迫自己經常入市炒賣，1年能捉到一兩次機會而又把握得到，好多時已經夠贏。
港股現時是試頂的走勢，簡單的策略是恒指升近降軌14200不破，買Put輪短炒，貪有值博率。相反若見破位，則改買Call輪博開展新升浪，但港股不明朗因素多，只宜小注。
倉內南太電子（2633）成交見縮減，若冇心揸長線，可伺機計數。
趙飛雲