今日對版之圍港熱話a
NBA季後賽（Play-off）進入白熱化階段，好多名牌球星冇份打，反而彈起咗幾件搶鏡的新秀、翻生的老餅。綜合旺角各大波衫波鞋店提供的銷量，最怕俾人話Out的香港人早就密密出手掃緊哥頓、韋特同米拿的相關產品。旺角某店主更稱，多得呢班惹人注目、極具話題性的球員，令到佢哋的波衫一周銷量狂升十幾倍。
記者：馬慶武 攝影：黃子偉
未出已狂接定單
HeadCoach店長Danny：「10代AJ波鞋啱啱復刻，嚟緊一定最多人搶，之前貨未到已經接到廿對定單，日內更推出白色、粉藍色。除咗波友，相信亦有唔少潮人支持！」（$1,099/b）
AllStar身份象徵
SportGalleryExpress店員阿輝：「上年新秀狀元勒邦占士（今季所屬球隊未能進入季後賽）的專用鞋，依然係後生仔最愛鞋款，呢對AllStar版更加係身份象徵。」
反潮流趁低吸納
SportGalleryExpress熟客James：「勒邦占士雖然入唔到季後賽，但始終係最人氣球星，趁呢排冇乜人買佢件波衫，價錢稍稍回落，梗係趁低掃番件啦，話咁快下季開波，占士又係一條好漢！」
公牛新星 哥頓波衫最後倒數
高比仔、大帝占士，有揭吓體育版的都一定會識佢哋；但着晒全身占士、艾弗遜裝出街落波地，只會畀真正的NBA球迷話你膚淺！
數到最近的NBA大熱球星，冇份打季後賽或者出咗局的必定即Out，上位的就包括有熱辣出籠常規賽最佳第6人哥頓（BenGordon）、來自冠軍大熱邁阿密熱火的韋特（DwyaneWade）及燒盡最後一年NBA生涯的米拿（ReggieMiller），印住佢哋大名的波衫、精品已被掃得七七八八。當中公牛的哥頓雖然出線危危乎，見報之時重可能出埋局，但係佢件波衫銷情就最熱烈，可能一眾由佐敦時代積落的Hardcore公牛Fans，等呢位「公牛救世主」的出現已經等得太耐喇！
佐敦迷轉軚：睇好哥頓！
黃先生同大部份80、90年代的NBA友一樣，最愛佐敦，除咗有齊1至20代的AJ波鞋之外，連不同版本的佐敦波衫，甚至佐敦「第一次」退休後轉打的棒球隊波衫都有儲。
佐敦年代過去，黃先生繼續狂買波鞋、勁儲波衫，不過已經冇明確追捧對象，除咗今季的BenGordan：「今年佢應該攞最佳新人獎，可惜NBA已經畀咗個最佳第6人佢，所以應該無行！」
近期熱爆波衫（售價：$620-$699/a）
邁阿密熱火DwyaneWade韋特
巨無霸奧尼爾的最佳拍檔，DwyaneWade屬上年新人，今年季後賽表現大熱大勇，呢件隨時係今季總冠軍球隊的波衫。
印第安溜馬ReggieMiller米拿
出身於NBA黃金時代的米拿，自從宣布打埋今季退休之後，所有產品都被勁搶，溜馬打入季後賽後搶風更勁。
鳳凰城太陽SteveNash尼殊
控球能力強勁的拿殊，係太陽打入季後賽的功臣，相信如果佢戒掉射罰球前舔手呢個核突動作，必定更受歡迎啦！
侯斯頓火箭TracyMcGrady麥基廸
隨住表現愈嚟愈好，人氣自然彈得愈高。呢件係為HardwoodClassicGameNight而設的復古款波衫，更加值得收藏。
西雅圖超音速RayAllen韋阿倫
3分射手韋阿倫，季後賽期間常常擔當扭轉局勢、反敗為勝的英雄角色，表現非常搶眼。
球星產品多線發展
必搶專用戰鞋
波鞋無波衫咁能反映球員的受歡迎程度，因為除咗一啲大牌球星有專用鞋外，其他新星都只有專用隊色而冇專用款。而最多球星撐的就係AirJordon系列，例如超音速的韋阿倫就着過復刻AJXIII代，小馬的米高芬尼就以AJXX為戰鞋。
a/ShootingFive 23951633
旺角皆旺商業大廈12樓1203室
b/HeadCoach 27710163
旺角瓊華中心2樓209室
c/SportGalleryExpress 23881332
旺角信和中心地下G5號舖
