呢幾日關於大學，幾多新聞！東亞銀行副行政總裁彭玉榮，出席中文大學辯論教學語言問題，竟然話反對英語化教育嘅，將來佢會用盡權力永不僱用！中大學生怒火中燒，搞到彭總要向學生道歉！
得大學人心者，就會得天下，因為大學生係社會嘅未來領袖！彭總講嘢咁激，得罪大學生，睇嚟佢都有排頭痕！
呢幾日中環耳語，講緊HongKongU今次無端端發達！「富貴於我如浮雲」嘅李嘉誠就唔同嘞！老李去到紐約咁遠，宣布李嘉誠基金會捐出十億，畀香港大學，做教育發展及科學研究用途！嚇到港大校長徐立之，幾乎擘大口出唔到聲，話係前所未有嘅健力士式慈善大禮！
八方聽講啲港大學生話：既然李生咁大手筆，咁港大乜都係假，應該第一件事就係減學費先！皆因現時一年大學學費，閒閒哋四五萬，每個月四千幾，向政府借貸啲大學生畢業，人工五六千起薪好普通，一出嚟打工就要個個月還錢，重有乜餘款供養父母，母親節請老媽子食飯，同埋請女朋友睇戲？咪焗住啲大學生BT睇盜版！
李嘉誠又話：捐錢畀大學，首選都係捐番畀香港，捐牛津哈佛，只不過係博取虛名啫！
八方回憶起，當年香港遭受金融風暴，本地大學生大量失業，尤其係正當美國「誤炸」我駐南斯拉夫大使館，同埋美機擦撞祖國偵察機，累死我空軍英雄王偉，合和主席哥頓．胡，就好有性格地宣布：捐款畀佢美國嘅「母校」普林斯頓大學喎！
當時有記者問：哥頓你係炎黃子孫，點解唔捐啲錢返中國，同埋捐畀本地大學呢？一向反對香港民主普選、身兼城大校董會主席嘅哥頓就話，香港啲大學，冇乜邊間係值得佢老人家捐啫！同埋唔知點解，嗰筆錢，聽聞普林斯頓始終都未收齊喎！
大財團賺到錢，回饋社會係好應該，亦都會受到尊重。若然東區隧道公司幕後啲財團又識咁，人人都揸多兩轉車行東隧喇！
傳真︰2623-9278
電郵︰[email protected]