巡迴演唱最後一場　萬名Fans揮棒
石川梨華哭別晨女

日本偶像組合Morning娘（晨女）前晚喺日本武道館舉行全國巡迴演唱會嘅最後一場，主將石川梨華亦正式宣布畢業，全場約一萬名歌迷揮動石川最愛嘅粉紅色螢光棒，喺一片歡呼聲之中，送別石川，石川感動到變咗喊包。

效力晨女五年
二十歲嘅石川梨華喺○○年加入晨女，而前晚舉行演唱會嘅日本武道館，正係石川當年首次演出嘅地方，所以令佢更加感觸。石川喺台上同晨女成員逐一擁抱，之後又攞出一封之前寫落嘅信，向全場歌迷朗讀：「五年實在過得好快，我過得非常開心，感謝大家畀我一段非常幸福的青春期。請各位今後繼續支持石川梨華、美勇傳同埋Morning娘！」
而喺上月離隊嘅矢口真里、晨女舊成員安倍夏美同後藤真希都有出現後台，默默支持石川。石川今後會以組合「美勇傳」身份繼續發展，喺今個月尾就會推出全新細碟。

小春初次登場
另外，只得十二歲嘅新成員久住小春，當晚亦首次登場同歌迷見面。隊長吉澤瞳喺台上即時邀請久住加入晨女足球隊，重教導小師妹揸咪嘅方法。