昨日母親節，鄭少秋為演唱會綵排，演唱會嘉賓鄧萃雯、關菊英和趙雅芝均有到場。鄧萃雯透露演唱會中的時裝造型頗性感，設計師要她盡量低胸，她會以姣姣地的兔女郎示人，但她擔心秋官看到其性感裝扮會忘記台詞。
鄭少秋昨日聯同鄧萃雯、關菊英和趙雅芝在灣仔星榆舞蹈學校綵排演唱會，秋官看來清減了少許，他笑說：「想keep都keep唔到啦，我連日來練舞所以瘦咗，之前六十七、八公斤，𠵱家就六十六公斤。呢排我同啲dancer嘅感冒傳來傳去，所以唔敢叫老婆整補品畀我食。」
昨日是母親節，問秋官如何和太太慶祝，他說：「呢十年嚟我嘅習慣係初一、十五食齋，今日都會同兩個女加埋老婆一齊食齋。」問他送甚麼禮物給太太，秋官說：「佢話要手袋，得㗎喇，佢會自己揀。」排舞期間秋官搭住一位女士的膊頭說：「佢係St.Paul學校嘅老師，我個女都話佢排舞好認真，我個女都有學跳舞。」
鄧萃雯在秋官的演唱會中，會以古裝和時裝亮相，她說：「綵排唔係好辛苦，但對我嚟講有難度，要跳中國舞同現代舞，我嘅古裝造型頭飾都幾重，時裝就性感。」
問雯女是否辣身舞？她說：「都辣辣哋㗎，要我姣姣哋好似兔女郎咁，但只係意識啫。我一陣要去試造型，設計師問我可唔可以再低胸啲，我就冇所謂，但係驚影響秋官做演唱會背歌詞同台詞。」雯女還表示母親節母親要工作，並一早已叮囑她不要送花和外出吃飯，因為日日都可以是母親節。
趙雅芝則透露已收到兩個兒子送的母親節禮物，但綵排後回家才拆禮物。趙雅芝又透露上次和秋官合作已是三、四年前在新加坡，她說：「我會唱《明明白白我的心》同埋一首獨唱歌，我同秋官識咗好多年，佢一叫我就應承，老公（黃錦燊）都畀咗好多意見，佢都有嚟睇綵排。」
採訪：卓美娟 攝影：陳慧安
