馮仁昭四圍超：
廖碧兒、官恩娜孭水籌款兼鬥靚

廖碧兒、官恩娜、陳芷菁同埋葉蘊儀噚日一早到山頂參加「揹水步行籌款」，佢哋每個人孭住四點五公升水喺山頂行一個鐘嘅路程，幫內地缺乏食水嘅貧窮家庭籌款。
貪靚嘅廖碧兒着咗對長靴嚟行山，官恩娜都唔弱，着件露腰小背心，兩個靚女爭妍鬥麗之餘，重好受小朋友歡迎。相反媽咪級藝人陳芷菁同葉蘊儀，雖然冇咁多人搵佢哋影相攞簽名，但係佢哋依然行畢全程，為缺水嘅小朋友出一分力。

折現送禮敬母
陳芷菁同葉蘊儀雖然放棄同仔女慶祝母親節嘅時間嚟行善，但係佢哋都話重有意義過飲茶慶祝喎！而廖碧兒同官恩娜咁啱都係以折現方式嚟送禮物畀阿媽，官恩娜好坦白咁話畀咗二、三千蚊媽咪買手袋，廖碧兒就闊綽啲，用五位數字請父母去旅行，不過，錢都係其次，最緊要都係有心同埋互相關懷最重要。

任葆琳睇中三百萬鑽戒
任葆琳同田蕊妮等噚日喺銅鑼灣出席母親節活動，佢話之前睇中卡地亞一隻價值三百幾萬嘅六卡鑽石戒指，任葆琳話：「早前家族間廠成功賣出，套現咗嘅錢，我會考慮買隻鑽戒畀媽咪，等佢願望成真，我會再去拍賣行物色吓，睇吓有冇更好嘅選擇。」

梁炳百萬鋼琴頌親恩
梁漢文噚日喺沙田用一座美國空運到港、兼且價值二百萬港元嘅鋼琴，彈奏一曲《真的愛你》送畀現場嘅母親。梁炳話屋企個琴只係值萬幾蚊，呢個鋼琴貴足一百倍，有機會彈到個咁正嘅琴，佢噚日當然會盡情享受啦。

家燕姐大女美國威威
薛家燕同囝囝噚日到奧海城出席宣傳活動，過千人即場砌出一個巨型心。家燕姐話大女石祐珊送咗張卡同絲巾畀佢，佢重向馮仁昭猛讚個女，原來祐珊喺美國搞咗個亞洲電影節，成功推動《無間道》喺美國各大學上映，連當地嘅報紙都有報道。