大市方向未明，成交又細，無論炒家或經紀幾乎個個都喊悶，所以一有股仔異動，就好容易引來炒家追捧，但好多時都只係虛火，炒唔夠一兩日就回軟，自問唔係超短線炒家，真係要小心，勿胡亂跟風。
小初問經紀黃本周有冇風險比較細嘅股票可以炒作？佢就推介銀建國際（171），一來股價已較早前高位回落頗多，而公司自從獲得阿媽明醒多項不良資產供處理後，業績明顯有改善，近日江湖又有傳聞，銀建將於短期內再獲阿媽照顧，又有不良資產以供收購，因此可以考慮。
銀建截至去年12月止，全年純利4.05億元，升1.2倍，現時往績PE唔夠14倍，若果阿媽真係有心栽培嘅話，銀建前景應不止於此。銀建上周五股價回落3.97％，收3.625元，成交1642萬股，金額6017萬元。
另外，新世界數碼（276）上周五股價突然急升20.34%，收0.355元。經紀陳話，公司上個月以每股0.24元配售5800萬股新股，集資1392萬元，若果股份落在炒家手上的話，散戶家陣跟風好易接火棒。
慕容小初