郭富城昨日在銅鑼灣時代廣場出席「母親節『心』愛媽媽」活動，與現場五十個家庭合力砌出一個心形，場面熱鬧溫馨。
提到如何慶祝母親節，城城說：「我安排咗一浪接一浪嘅活動𠱁媽咪，首先同佢食飯，然後會親手幫媽咪做facial，我媽咪雖然成七十歲，但係重好貪靚，我成日𠱁佢因為天氣轉，塊面先至會有皺紋。我都算學咗一招半式，不過親自幫媽咪做facial都好緊張。」
問城城買了甚麼母親節禮物，他說：「我買咗部腳部按摩器畀媽咪，我細個屋企好窮，媽咪湊大我哋五兄弟姊妹真係唔簡單，所以做仔女嘅唔止要孝順，更加唔可以發媽咪脾氣。不過我知媽咪其實最大嘅願望係我搵個好女仔結婚，等佢可以飲新抱茶，我知佢恨飲呢杯茶好耐，所以應該送多塊口水肩畀佢。」
採訪、攝影:顏英儀