今季到咗中超上海中邦嘅香港隊隊員吳偉超，前日對青島取得處子入球，證明土生土長嘅香港球員只要肯付出，唔怕辛苦，有能力響中超立足！
年僅二十三歲嘅吳偉超早幾年因快譯通退出而北上闖天涯，先後踢過廣州同南京等中甲球會；而佢抱住一顆「足球心」努力不懈，今季得到新升中超嘅上海中邦垂青，同前國家隊隊長范志毅做隊友鎮守後防。
求大俠噚日打電話畀超仔嘅爸爸吳志英（前廣東名將），吳前輩話，見阿超可以咁快響中超立足，重入埋波，都感到相當安慰；希望佢繼續努力，唔好自滿，重話以阿超呢個年紀，只要累積多啲經驗應可以再進步。
吳前輩重話，早排已經申請咗收費台嘅中超台，可惜前日因唔得閒而冇睇直播；不過，超仔賽後立即打電話同佢分享呢份喜悅。據聞中邦連贏兩場，全體球員已經可分成百六萬人民幣獎金，超仔今次可以話名成利就囉！
車路士前日由馬基列尼射十二碼補中贏查爾頓；話說領隊摩連奴賽前下令，正常由林柏特射，但領先二比○就由馬基列尼射，明醒佢。雖然隊波無領先，但後者仍半推半就開齋。唔知買咗林柏特首球者點諗？講時講，馬基列尼賽前練波兩射十二碼皆失，加埋呢球係三度宴客。
國際米蘭後衞哥度巴早兩日同球迷發生口角，被揶揄佢同國米咩都贏唔到，結果一怒下「兜巴星」去個球迷度。事後教練文仙尼話，如果個仔同佢講因為口多咁俾人打，定會打多個仔一巴。我求大俠未知事情始末，不過國米士氣麻麻，重要爭意大利盃，佢力撐球員嘅意圖唔難理解。
中國前鋒曲聖卿上個禮拜六喺盃賽首次為澳洲阿德萊德隊正選上陣，成為歷來第一個響澳洲球壇亮相嘅中國球員。雖然佢無入波，但表現活躍，結果幫球隊砌低墨爾本勝利隊。賽後澳洲傳媒讚曲聖卿踢得好，甚至有媒體選佢為全場最佳球員，算係攞到頭彩同埋為中國足球爭光囉。
溜馬噚日作客大炒塞爾特人，取得NBA東岸四強最後一席；呢個系列賽未必最精采，不過就夠晒火爆，七場加埋有二十次技術犯規，噚日塞爾特人兩個新仔維特同柏堅斯輸梗都犯規被罰出場。晉級嘅溜馬聽日對住同係「爛仔波」嘅活塞，新仇舊恨，隨時打交多過食飯嘞。
逢周一至周五見報