短期港股上落格局，上唔到去邊，亦落唔到去邊。喺藍籌三兩格波幅中，揑得準，買啱輪，三茶兩飯有着落。
滙控C輪3821：滙控（005）下周三除息1.09元，除息不利C輪，但除息前亦吸引好息者買貨，對正股與C輪亦有利。滙控C輪有得諗。滙控C輪近期者4441仍然大熱，4445剩番12個交易日買賣，交投將由熱而冷。
戰場漸移到8月嗰度，8月到期嘅滙控C輪總共6隻，3隻（3522、3914、3886）當作透明可也，剩番3隻（3811、3852、3821）可以揀嚟炒，貨比3家冇蝕底，當中最靚嘅係3821，壽命贏晒，溢價贏晒，交投贏晒，槓桿率贏3811輸畀3852，睇吓隔籬個表就清楚。
3821與3811比拼，更見着數，3821溢價1.3%，如果同3811嘅溢價1.7%睇齊，股價原來值36仙（現價31.5仙）。壽命長成個月，槓桿率又靚啲，冇理由溢價會低過3811。
章盛