地產Ｙ住響何文田，周末例牌上去深圳消費，佢話自何文田揸車入深圳，經皇崗口岸，三十五分鐘就到，十分方便。一到深圳咯喎，打波、按摩各適其適，便宜兼過癮，老友Ｗ笑佢：「唔怕會生牛皮癬咩？」地產Ｙ最初唔明白，半分鐘後立即回答：「民主黨人先至會生牛皮癬啫，東莞每晚有九萬九千九百九十九人冇事呀！」
笑言一餐之後，地產Ｙ話佢最近一次索性趁長周末揸車上到廣州，市面自然熱鬧到極。廣州朋友話要帶佢去睇靚嘢，地產Ｙ心諗：「有乜靚嘢我喺香港未見過呀？」啊，原來丹麥名牌B&O在廣州開咗一間分店，賣電視及音響器材。B&O在中環德成大廈有一間店舖，地產Ｙ與左丁山之流，從來都係在窗口望吓，唔敢行入去，因為實在唔捨得用十零萬買部電視機也。
廣州嘅人均GDP與香港相差幾倍（中國人均GDP只有香港二十五分之一），買得起B&O咩？地產Ｙ與朋友入到去廣州分店，嘩，啲貨物甚為新款，價錢極為誇張，但係生意好到極。聽到幾位廣州同胞講：「以後我哋唔使去香港買啦！」地產Ｙ向朋友打探：「知唔知呢度一日做幾多生意？」朋友話：「問到就打電話畀你。」
返到嚟香港，地產Ｙ收到廣州來電，朋友話：「講出嚟一定嚇死你，消息來源千叮萬囑話要保密，都係不便透露咯。」地產Ｙ話：「你作大咩，廣州有幾多人有資格買B&O呀？」一激之下，朋友講咗少少。究竟係幾多呢？地產Ｙ唔肯講畀左丁山聽，只係話：「任你估啦，你點都估唔到。」估到又冇獎品，估嚟做乜，不如度吓星期三馬纜好過。我哋入到本港商店，已係二等港燦，冇資格估，譬如去置地SwankShop，見到成枱西裝喺度，以為係平賣㖭，想話裝吓，售貨員會話畀你聽：「對唔住，我哋包唔切啫，已經全部賣晒，等陣要送去酒店。」呢個時候，就知道自己勞碌多年，唔識搵錢。