三更窮、五更富！可以說是今個星期DVD碟場最佳形容；上星期4、5套三區大片散落場，叫人買唔切！到本周就一隻新碟都唔落，冇計！「消化期」嘛。今個星期「翻煲」上周末壓軸登場嘅《亞歷山大帝》；雖然年初上畫時票房、影評人評語一般，但DVD去貨好強，話晒都係史詩式大製作！普通版（雙碟版）固然搶，限量2,000隻嘅三碟特別版，𠵱家市面已經接近斷貨，見到千祈唔好等，畀錢啦！
記者：朱崇德
《亞歷山大帝》拆碟睇
今次《亞歷山大帝》係3區先嚟過1區。雙碟普通版已有額外Bonus片段收錄，包括電影製作特輯、幕後製作花絮、訪問同戲院預告片等。至於全港發行2,000隻嘅限量版，除原有的雙碟DVD外，重隨碟附送獨立編號皮革證書及5張明信片，但最引人注意者，當然係第三碟的導演「奧利華史東拍攝紀錄」，收錄演員軍訓、大象拍戲前預演同導演/演員拍攝時等事情，值得一睇！
25歲勝利戰神
《亞》是根據史上最具影響力的君王──亞歷山大帝（哥連法路飾）的一生改編而成。他生於公元前356年的古希臘，是戰無不勝的戰神，由他率領的馬其頓軍，8年內先後攻克了現在希臘、土耳其、埃及、以色列、約旦、黎巴嫩、伊拉克、巴基斯坦及印度等，從未輸過一場仗，25歲時已征服了當時世界版圖上9成土壤！不過更具趣味的，是他身邊的人和事，包括講述野心勃勃的母后（安芝蓮娜祖莉飾）不擇手段的推舉亞歷山大帝繼位，並披露他與波斯妻子露珊（羅沙奧達臣飾）、兄弟戰友赫菲思恩（謝域力圖飾）以及良師將軍托勒密（安東尼鶴健士飾）之間的感情。
牛津史學博士故事取經
據知金像大導演奧利華史東（曾拍《殺戮戰場》、《生於七月四日》），一直是亞歷山大帝的超級Fans，畢生志願就是將他的事迹搬上大銀幕！為重建這個亞歷山大帝皇朝及戰爭偉績，拍片共耗資1億5千萬美元，亦特意請來研究亞歷山大帝、舉世知名的牛津大學權威羅賓連霍士擔任顧問！而動用的臨時演員更高達1000名，絕對係誠意爆燈的史詩巨著。
兩場大戰支撐全局
全套電影主要由兩場大戰撐起，一是波斯一戰4萬精兵大破25萬雄師，真係一戰成名；感覺上，奧利華史東較強於人物性格及角色衝突的刻劃描寫，反之戰陣及短兵相接的大場面表現手法較弱。另一場輕騎兵決戰印度大象戰陣，拍出慘勝的古戰場恐怖感覺，士兵連年征戰，軍心疲態畢現，以一夫當關之勇，掀起全軍殺敵之心，戰勝這場不可能的戰役！
店舖查詢：DVDPro
電話：23326326
地址：旺角奶路臣街6E德發商場地庫B4舖