光妹背叛任天堂玩Xbox網上急沙冧

電視遊戲機Xbox同MTV電視台前晚喺美國洛杉磯Avalon夜店舉行派對，當晚重有樂隊TheKillers即場表演，吸引唔少名人到場，星光熠熠。不過，身為另一遊戲機任天堂代言人嘅日本女歌手宇多田光，竟然亦現身當晚派對。事後自知犯錯嘅光妹，前晚急急喺自己嘅網頁內嘅日記留言補鑊，向任天堂道歉。

掛住晒恩愛
近日經常被日本傳媒報道婚變嘅光妹，前晚同老公紀里谷和明齊齊出席派對闢謠。不過，掛住同老公睇騷晒恩愛嘅光妹，竟然忘記咗自己身為任天堂代言人嘅身份，佢不但喺現場接受日本MTV電視台嘅訪問，重夠膽死對住鏡頭大讚Xbox。

臨瞓先知衰
光妹玩夠返到屋企刷完牙打算上床早唞，臨瞓前先至醒起今次玩出禍，光妹即時嗱嗱臨喺自己嘅網頁內嘅日記留言補鑊，向任天堂沙冧道歉，重話自己背叛咗任天堂。
而當晚重有唔少明星出席派對，包括久未露面嘅英國男歌手RobbieWilliams、女歌手AshleeSimpson、《魔戒》系列嘅男主角伊利亞活（ElijahWood）以及《迷失東京》女主角施嘉莉祖安遜（ScarlettJohansson）等，非常熱鬧。