馮仁昭四圍超：
陳豪自嘲唱得差　出碟唔怕死

吳卓羲、林保怡、陳豪同鄭嘉穎噚日去咗大埔超級城，宣傳無綫最近推出嘅《男人魅》專輯，吸引過千人圍觀，其中以吳卓羲嘅fans最多，聲勢亦最浩大，而鄭嘉穎嘅歌迷就稍遜。

「我知要反省」
問到鄭嘉穎知否歌迷不多，佢就話：「佢哋喺度，重有同我打招呼，我啲歌迷都唔會再舉牌，其實我歌迷會每年都會有聚會，佢哋支持咗我好多年。」
至於初試啼聲嘅陳豪，都知佢嘅唱功唔掂，佢話：「我知要好好反省。」問佢怕唔怕俾其他歌手比下去，佢就話：「其實已經係比下去，我係新人，冇壓力，唱得重free。」陳豪又話會急起直追，最近重拜師學唱歌，如果有唱片公司搵佢出唱片，陳豪嘅反應係：「唱片公司唔怕死，我都唔怕去死。」
採訪：楊潔雯　攝影：陳偉權

房祖名狗仔孝敬媽咪
房祖名前晚喺灣仔會展為國際青年會五十周年晚宴擔任表演嘉賓，重自爆話今次係執方力申二攤嚟演出。今日係母親節，祖名話要開工，冇時間陪阿媽林鳳嬌，不過佢已經送咗禮物，佢話：「早年我送盆栽畀媽咪，今年我就送咗隻金毛尋回犬畀佢。」

Theresa厚禮頌親恩
Theresa同Stephy噚日喺尖沙嘴出席活動，今日係母親節，Theresa話佢準備咗三斤燕窩、一張按摩椅同五位數字嘅現金送畀媽咪做禮物。對於有周刊話Stephy係「屯門邨花𠝹仔上位」，Stephy話冇可信性，因為報道話佢嘅住所同就讀學校都唔啱。

大劉三代同堂賀節
大劉劉鑾雄平時最鍾意去灣仔福臨門歎茶，噚日下晝一點左右，馮仁昭見大劉同佢阿媽、細妹同囡囡喺福臨門出現，三代同堂咁熱鬧，唔知係咪預祝母親節呢？而平時出入總係搵保鑣擋駕嘅大劉，噚日重任由記者影相，心情睇嚟相當靚㖭！