名媛親子樂　趙曾學韞愛咀咀
薛芷倫踢波唱K潮襯子女

今日是母親節，「新潮媽咪」薛芷倫前晚出席派對時透露平時會落球場陪兒子踢波，或逛唱片舖，建立亦母亦友的親子關係。而名媛趙曾學韞則表示數十年來，都保持與子女親嘴的習慣。

薛芷倫、何超瓊和榮文蔚等，前晚到跑馬地出席天機公關要員鄭紹康的生日派對，大夥其後更轉場到銅鑼灣唱卡拉ＯＫ。薛芷倫（Fanny）十時後才趕到，她透露近日忙於為子女溫書應付考試，今日母親節則會出外吃飯。

「每日抽時間傾偈」
問薛芷倫與子女的相處之道，她說：「平時嘅功夫最緊要，每日抽時間溝通、傾偈，建立好似朋友又係媽咪嘅親子關係。可能我自己新潮啲，心境後生，我鍾意同仔女一齊玩、一齊開心。個女鍾意唱Ｋ，我咪陪佢行唱片舖，講吓潮流嘢，講吓韓星；個仔鍾意踢足球，我會同佢一齊落場踢波，講啲球星同比賽。」
問薛芷倫負責守龍門，還是做前鋒？她笑說：「唔知呀，我都係行行企企，志在參與。」薛芷倫又謂會致電移居加拿大的母親，祝賀母親節。
而「慈善天后」趙曾學韞前晚為「香港傷健策騎協會」舉行晚宴籌款，兒孫滿堂的她謂會全家人慶祝母親節，她說：「我同啲仔女成日傾偈，有時會叫秘書幫我send短訊，重有，我哋到𠵱家都成日嘴對嘴咁kiss，感覺重close啲，外國好多人係咁。」

傅明憲今年抱「孫」
穿LuisaBeccaria波點裙的傅明憲亦有出席晚宴，未做媽咪的她今年有望榮升「外婆」，她說：「我遲幾日去四川睇我助養嘅熊貓『葉芝麻』，佢今年六歲，護理員話佢好有機會今年生育，我當正佢係我個女，我有機會榮升婆婆。」
採訪：DebbieLum、JessicaNgan
攝影：RickyChan