馬歇爾歇馬 - 左丁山

馬歇爾歇馬 - 左丁山

中午時分,碰到教授W,佢立即捉住左丁山講:「喂,你上星期六講過台灣報紙六十年代創作一條新聞標題,『華來士來華』,橫排左右睇,字、意都係一樣。嗱,講古仔畀你聽,呢條標題並非台北報紙自創嘅,而係抄番嚟嘅啫。國共內戰年代,美國想話調停,派馬歇爾將軍到中國見蔣介石、毛澤東,希望國共組織中國聯合政府。但老蔣老毛都唔聽佢,馬歇爾怏怏而去。美國仍然唔死心,再派一位大使級人馬嚟中國調解,此人叫做華來士。當時嘅一份報紙,我唔記得係邊一份,大字標題:『馬歇爾歇馬、華來士來華』,似足對聯,十分工整,兼且由無論直排橫排,從左到右,或從右到左,都係馬歇爾歇馬、華來士來華。呢條標題先至值一百分呀!」唉吔,教授係化學專家,以為佢只係識得化學理論啫,乜報壇典故都識,真係通識教育之典範也。

連戰登陸,國共形勢逆轉,國民黨既然已無資格同共產黨打過,彼此握手言和,正式結束敵對狀態,誰曰不宜?一九四九年之後,邊有中國人希望再與中國人作生死戰?儍嘅咩,當年國軍老兵都話連戰訪問北京係啱嘅。
連戰返回台北之日,中正機場戒備嚴密,強哥自台北回港,特登提早幾班機,以免碰上墟冚場面。一返到赤鱲角,立即去一號停車場攞車,走到去酒店車泊車等候處,見到一位四十歲左右嘅阿嬸推住輪椅出嚟,輪椅上有一年老西婦,西婦預備上酒店名貴房車(平治)之前,突然話要去廁所,嗰位阿嬸滿面不悅之色,大聲叫:「有冇搞錯呀!𠵱家話要去廁所?」大聲到嚇親西婦遊客,不知所措。強哥聽到唔抵得,正欲幫手之時,一位年老阿嬸亦推緊輪椅出到嚟。年老阿嬸話:「廁所喺左手邊之嘛,我扶佢去啦。」之後立即主動幫手。強哥話:「機管局可唔可以提醒啲服務外判,對遊客要有基本禮貌呀,呢班推輪椅阿嬸,如果惡聲惡氣,會趕走遊客㗎!」