八方早前喺呢度登咗一幅陳年舊相，成班政務主任歡送第一位華人政務官徐家祥，當時八方提到陳四萬係第一位女華人AO，不過，有高人指正，八方可能唔啱，因為陳太係六二年同楊啟彥、霍羅兆貞一齊考入政府做政務官，之前一年，即係六一年，有一位叫周雪凝嘅女士已經成功考上，成為第一位華人女AO。呢位周女士非等閒之輩，佢係周錫年個姪女，做咗一年就辭官不幹。
呢啲歷史，𠵱家相信好少人知。八方於是問楊啟彥，佢記得好清楚，重話當年（六二）嘅華人政務官，數埋只有一圍枱咁多，當中有啲已經去世，有啲一早離職，除咗佢同陳太佢哋三個新人，重有徐家祥、鄭棟材、李福逑、施偉賢、楊永泰、陳文卓、吳國泰、黎家華、黃子奇、程慶禮、程尚文同埋何鴻鑾等。
唔講唔知，喺六五年，港英政府成立咗個SalaryCommission，第一次確認AO係政府運作嘅骨幹，即係話，要靠AO嚟做嘢，佢哋被認為係政府最叻嘅一群，唔怪得以前咁多人搏晒命考AO啦。
至於煲呔同肥龍許仕仁，楊啟彥話佢哋係因緣際會，六八年暴動之後，港英要加強地方行政請大量政務官，佢兩個就由EO同埋教育官職系成功轉入AO行列。咁睇吓啲紀錄，煲呔七一年七月轉做AO，比肥龍早一個月，正式係同撈同煲兄弟，今時今日互相照應有原因。當然正如楊官講，轉到做政務官都有番咁上下，因為嗰度好似翰林院，個個都係進士。
一幅舊相引嚟咁多古仔，都係要多謝徐家祥位喺理大做院長嘅威水媳婦林倩麗，幅相係佢提供畀壹仔，益埋八方。
爆料熱線：29290000、27860099
報料傳真：26239278
報料電郵：[email protected]