星級名車<br>LegacyB4少辣易揸　鄧穎芝︰我要換車！

星級名車
LegacyB4少辣易揸　鄧穎芝︰我要換車！

相約試車前，筆者於機緣巧合下坐過鄧穎芝（Vangie）親自駕車，感想係：「一見直路即踩油，手車都算辣辣哋！即時浮起搵佢試車嘅念頭，不過試咩車呢？」不如搵架辣車過佢試吓啦！又唔係噃！佢揸開自動波房車，可能會唔慣。思量過後，終於搵嚟富士LegacyB4，呢架自動波四驅辣房跑畀Vangie試，果然一拍即合，Vangie試完車落地第一句就大嗌：「爽呀！我要換車，我要換車，我要換車……！」

記者：馬慶武　攝影：陳陶鈞

最怕大車難泊位

年輕人都係反叛，鄧穎芝（Vangie）一考到牌就有得揸Benz，雖然係Vangie爸爸用過嘅舊車，但係話晒都係名牌房車喎！「我真係好鬼憎呢架車！大大架四四方方笨到爆，次次泊車都好辛苦！」
Vangie唔鍾意呢架E180，全因外形問題：「我爸爸唔畀我換車㗎！佢話呢架車安全性強喎，咁事實我又真係試過一次濕地炒埋壆，個人真係一啲事都無……！」
Vangie話自從呢次之後，佢爸爸更加堅決唔畀佢揸跑車，所以Vangie聽見有得以工作為名，攞正牌試富士辣車，即時笑晒口應承。

■「我要換車！」Vangie話經過今次試車之後，好有換車嘅衝動，因為B4嘅加速能力同佢架E180真係爭好遠。

最鍾意頭冚入風口

試車當日，Vangie一見到LegacyB4真身，一如所料極度興奮，指住頭冚入風口猛嗌：「好型喎，好有落場跑車Feel。」但興奮表情突然轉為皺眉擔心：「唔係棍波車嚟㗎呵？」揸手波車唔係Vangie強項，加減波卻係佢嘅至愛：「有棍波嘅玩味，但又唔使擔心開車死火、塞車勁攰呢啲問題，梗係吸引啦！」Vangie圍住架車轉咗個圈，最滿意係LegacyB4嘅頭冚入風口及車頂天窗，最不滿嘅係車尾無定風翼，嗜辣性情表露無遺。

拖波過彎最好玩

第一輪試車，安全起見，由富士隨車嘅司機哥哥及負責拍攝嘅攝影師率先跟車，20分鐘過後，LegacyB4隨住轟隆排氣聲回到石澳停車場。先細細聲問問司機哥哥：「Vangie揸得快唔快？手車掂唔掂。」司機哥哥細聲回應：「手車幾好喎！都揸得幾快，頭先踩到成……」
背後突然傳嚟大叫：「嘩！好爽呀！真係好好Feel，如果可以擁有呢架車就好喇！」Vangie話LegacyB4油門反應強勁，一畀油已經有彈出嘅感覺，而且轉向好穩定。當然，LegacyB4擁有260匹最大馬力，35.0kgm最大扭力輸出，加速力絕對唔講得笑，而且恒式四驅系統帶嚟穩重嘅轉向。Vangie更勁讚B4嘅5前速加減波好玩，拖波感覺好爽。咦？拖波？又話揸棍波車唔掂？
「係呀！但係我打GT4嗰陣已經學識拖波過彎啦嘛！」
嘩！原來頭先司機哥哥同攝影師嘅處境都相當危險喎……

■Vangie雖然貪玩、成日都講笑，但試車時都好認真，配合B4，都可以畀到乘客穩定嘅感覺。

車身有落場跑車味

■Vangie最愛車頭嘅中冷器入風口，因為好有落場嘅跑車風範。

惡意頭燈
■雖然跑味唔算濃，但一雙頭燈連霧燈仍然充滿「惡意」。

■車尾沒有裝上誇張風翼，感覺較低調斯文，但Vangie就嫌辣得唔夠徹底。

■門邊鏡設有指揮燈，提高安全性，更有房車風範。

富士唯一加減波車

■5前速加減波軚環按掣反應敏銳，最啱Vangie呢類又懶又貪玩嘅用家。

■Vingie話揀車一定要揀有天窗嘅，因為佢最怕侷促感覺。

■將豬仔公仔當波棍套？隨時脫手好危險喎！

同廠獨有
■B4係富士車系裏其中一架設有加減波嘅車款，好玩得嚟更輕鬆舒服。

車廂其他實用位

■後排座椅好寬敞，散發同廠車系少有嘅房車味道。

■可以將後排中間的手枕拍低，令乘車感覺更舒服。

■前座雜物匣位置就手，而且擺放空間尚算充足。

■後座設有專用杯座、煙灰盅，設備齊全體貼。

現役座駕：平治E180

■雖然Vangie話最憎呢架車，但係都好畀心機布置，佢就好抵死咁話：「坐喺車入面，暫時睇唔到佢個外形，都可以呃吓自己先嘅。」

■將豬仔公仔當波棍套？隨時脫手好危險喎！

SubaruLegacyB42.0GTSpec.

引擎：1994cc水平對向4汽缸Turbo
馬力：260ps/6000rpm
扭力：35kgm/2400rpm
傳動：5前速自動+/-波
懸掛：（前）麥花臣支柱（後）多連桿
制動：（前）通風碟（後）通風碟
輪胎：215/45R17
尺碼：4635×1730×1425mm
軸距：2670mm
車重：1440kg
車輛提供：意美汽車（25112727）

■Vangie現役座駕係爸爸送畀佢嘅BenzE180，佢就嫌架車太過大架，最重要係唔夠有型。