男子組合Boy'Z新舊成員張致恆（Steven）、麥子豪（Dennis）和關智斌（Kenny），三人日前提早慶祝母親節，Steven陪母親到街市買餸、Dennis陪母親吃麵及逛街，而Kenny則陪雙親大啖海鮮兼逛寵物店。
男子組合Boy'Z成員Steven日前返母親邱伊愛麗所居住的觀塘翠屏邨寓所，品嘗母親炮製的住家菜。當日Steven先陪母往街市買餸，之後便到茶餐廳歎茶，Steven媽談到兒子事業發展時即笑說：「佢掂即係我掂！佢𠵱家大個定性咗啦，希望佢勤力啲、生性啲，二十幾歲人都要諗吓將來。」
Steven曾因工作懶散一度被英皇雪藏，Steven媽說：「佢做乜嘢都懶啲，以前唔起身返學，我就用濕毛巾飛埋佢塊面度整醒佢，但佢做呢行都好畀心機㗎。」Steven則說：「我唔敢講話要搵好多錢，但我希望屋企人健康同開心，做好自己已經係報答媽咪！」
Steven新拍檔麥子豪（Dennis）日前亦陪母親到筲箕灣東大街食麵兼逛街，Dennis媽滿臉幸福說：「佢由細到大都好孝順，我唔擔心佢做呢行學壞，淨係擔心佢太夜瞓，所以我成日煲湯畀佢飲。」問她對兒子有何期望？她笑說：「最緊要身體健康，開開心心。」Dennis則說：「喺我心目中，媽咪近乎完美，所以第日我嘅女朋友最好要有我媽咪嘅內涵同人品。」
而Boy'Z前成員關智斌（Kenny）日前則與雙親同到銅鑼灣一餐廳歎海鮮，之後便逛寵物店，原來Kenny打算送狗仔給媽咪作為母親節禮物。Kenny媽昨日接受本報電話訪問，問她對兒子有何叮嚀？她說：「唔好成日將啲湯擺喺度唔飲，唔好咁夜瞓。無論佢做乜嘢工作，媽咪都會支持佢，最緊要身體健康。」
Kenny昨日在電話中表示藉着今天母親節要向媽咪說：「你唔使擔心我㗎，有時我都覺得自己曳，媽咪同我傾偈時，我成日都話『得啦』、『得啦』，唔會細心聽意見，不過我會改㗎啦！」
採訪：朱倬誼
攝影：林德雄、娛樂突發組
