近日承父親許冠傑（Sam）衣鉢加入樂壇的許懷欣，原來不止有着爸爸的音樂細胞，就連慳儉踏實的性格也似足。但在工作上，懷欣認為自己不會因為是阿Sam兒子而獲任何優待，故違反父親堅持不開記招，不做電視及電台宣傳和不接受記者訪問的三不政策，為自己增加曝光機會。
挾「歌神之子」之名入行的許懷欣，即將推出他首張個人唱片，正式展開他人生新一頁。為迎合香港市場需要，不黯中文的懷欣，不但要學廣東話唱廣東歌，還要跟他父親唱反調，就是頻頻出席電視台和電台的大大小小活動，接受各大報章雜誌專訪，因為懷欣明白到，自己是樂壇新丁，要參與這個遊戲，便要遵守這個遊戲規則，更重要的是，為自己新唱片宣傳造勢。
懷欣此舉跟去年復出開個唱及出唱片的阿Sam所定的「三不政策」（不開記者會，不做電視及電台宣傳活動，及不接受記者訪問）剛剛相反。
對於父親的低調作風，懷欣大表贊同說：「我知佢諗法係點，佢唱歌做騷，都係想大家happy，佢入行咁多年，大家都知道佢係邊個，但我係新人，自然要依番𠵱家新人嘅做法去做，絕唔會因為我係邊個邊個仔而有唔同。」
雖然，懷欣認為身為樂壇新丁，不會因為「歌神之子」而獲特別待遇，但他卻相信歌迷會因為他是阿Sam兒子，而對他的音樂多加留意。
懷欣說：「一定會有咁嘅事發生，爹哋有好多追隨咗佢好多年嘅fans，我未入行前幫爹哋做騷，佢嘅fans對我同Scott（弟弟懷谷）都好好。」
究竟在懷欣心目中的阿Sam，又是怎樣的一個父親？他說：「我覺得佢好勁，又寫詞又作曲，而且佢好明白事理，由細到大佢都冇打過我哋，如果我同Scott做錯事，佢就會同我哋慢慢講道理，講到明白為止。」
不少藝人後代，在求學時期已滿身名牌，返學揸波子，但懷欣從不追求這些物質上的享受，他說：「在我嚟講，夠食夠用就足夠，買嘢只係買必需品，至多係讀書時期買過四支結他，成萬蚊買個名牌袋？我實在唔捨得用，怕用幾用就整花，既然買咗唔捨得用，不如唔好買！
「由細到大爹哋同我哋行街食飯，都唔會去名店，我哋成日一齊去廟街，女人街，我覺得好舒服，反而去名店，我會周身唔自在。其實，𠵱家留喺香港發展，除咗做嘢公司有保母車載我之外，平時出街我多數搭巴士，一來我覺得搭巴士好方便好舒服，二來搭巴士可以睇到好多嘢，見到唔同嘅人，幫我搵到唔少創作靈感，就正如去到外地，淨係匿埋酒店，又點了解到當地嘅風土人情呢？」
正所謂有其父必有其子，看來懷欣身上不止有阿Sam的音樂細胞，就連節儉樸實這性格，也似到十足十！
撰文：戴彩煥
攝影：陳慧安
場地及電單車提供：HarleyDavidson
化妝：AngelYip、ManYee
髮型：WingCheung、PinkybyHairCulture
