鍾鎮濤（阿B）女友范姜素貞今年首次以媽媽身份慶祝母親節。由於阿B的大兒子身在美國讀書，二人先帶同小B女暢泳，再與大B女一起切蛋糕慶祝，樂也融融。范姜雖然初為人母，但已跟阿B與章小蕙所生的子女過了幾年母親節，她表示作為母親，只盼望兒女健康生性。
今天是一年一度的母親節，鍾鎮濤的女友范姜自去年八月產下愛女鍾懿（Blythe）後，首次以母親身份歡度母親節，不過因為阿B有工作在身，為了一家人能齊齊整整地慶祝，日前便提前慶祝一番。
幼女乳名果米子人
日前下午阿B與范姜先帶愛女Blythe往游泳，原來現時九個月大的Blythe非常喜歡游泳，范姜表示看到女兒游泳時開心的樣子，自己也感到十分快樂，故一早便選定游泳作為慶祝母親節的節目之一。只見Blythe長得又肥又白，手瓜一節節的如「米芝蓮」公仔一般，范姜與阿B則以國語叫她「果米子人」，阿B解釋說：「我大仔細個時最早學識嘅係果米子人四個字，唔知點解我見到呢個女，覺得佢好似呢四個字，咪用嚟做佢乳名囉。」
而范姜看着女兒玩水，即露出一副有女萬事足的模樣，游泳過後，范姜先帶女兒返家，阿B則往接大女兒鍾嘉湄（Tinka）放學。回家路上Tinka要求父親帶她去買蛋糕及鮮花送給Auntie范姜，等晚飯後一家人齊齊切蛋糕慶祝母親節，樂也融融。
對於首次以媽媽的身份慶祝母親節，范姜坦言雖然不感到特別興奮，但也甜在心頭，又透露未生育前，其實每年都會收到母親節賀卡，她說：「Tinka同BonBon（阿B長子鍾嘉浚）每年都親手畫母親節卡畀我，我都已經好開心，卡裏面都有寫MommyIloveyou之類嘅字，但佢哋都叫我Auntie，今年係第一次聽到有人叫我媽媽，Blythe七個月大就識叫媽媽，分別只係喺呢度啫。」
歎生仔容易教仔難
其實范姜自與阿B拍拖後，便挑起做母親的職責，照顧阿B與章小蕙所生的一子一女嘉浚和嘉湄，所以她當母親的感受與一般人不同。
范姜說：「我未生仔就要教仔，係先帶細路再生細路，跳過咗生仔同湊BB呢兩個階段。我覺得作為媽媽，教細路呢個項目係最難，你要因應唔同嘅小朋友有唔同嘅教法，因為佢哋都有自己嘅想法，唔係一套教法教晒咁多個就得㗎。相對大肚同生BB就幸福同簡單得多，因為大肚時全世界都當你係女王咁照顧。」范姜又指出因阿B是公眾人物，家庭生活透明度較高，故她怎麼扮演「好媽媽」角色的難度也較高。
兒女生性慈母心足
問范姜今年母親節會送甚麼禮物給母親及最想收到甚麼禮物時，她說：「以前我每年都同兄弟姐妹夾錢買禮物畀媽媽，同打電話去同佢傾偈，今年都一樣，但其實媽媽乜嘢禮物都唔志在，只要仔女健康同生性，所以仔女生性，對媽媽嚟講就日日都係母親節咁，如果仔女唔好，只係喺母親節送份大禮，咁又有乜嘢意思？如果生咗啲好衰嘅仔女，咁有母親節，對媽媽嚟講咪重心酸。」
採訪、攝影：蔡如玉
