麗豐（1125）兩個星期前公布，岳少擔正主席一職，疑慮盡消，再跌可以兜底。岳少身為麗豐大股東，擔正做主席，本來好順理成章，但麗豐屬麗新系內最具資產質素（資產淨值53.3億元，比阿媽麗國（191）多成倍）及盈利能力公司，岳少坐正，主客分明，屬正面消息。
又麗豐上月中公布05年度中期（01月止）純利5019萬元，同比微升0.2%，睇落奀少少，但最新中期純利重要組成部份，係上海住宅銷售豐收，大賺5455萬元，相對04年度同期以減值回撥4255萬元去支持純利，嚟得實淨兼且啖啖肉。
上海房地產股包括湯臣（258）、上海証大（755）及上海復地（2337），今年頭創埋1年或沙士以來新高，而麗豐好似晨早響應宏觀調控，過去一年大落後，以現價資產折讓76%，05年度PE就算維持往績6倍，都跑贏同類股幾十條街，再跌落年頭低位0.2元，值博率更充份，但講明再伸手就咪玩。
中航科工（2357）同其他汽車股一樣，04年頭以嚟，有咁耐就插足咁耐，但呢期可以小注博反彈。今期所見，汽車股先見慶鈴（1122）起動，並宣布策略股東五十鈴有意增持，慶鈴股價晨早飛天。繼而啱啱對上星期五，吉利（175）停牌話涉全購。似乎業界內部認為，汽車股跌得過殘，係適當時候入市。中航科工又點？隻股跌到現水位0.58元，NAV折讓擴大到44%，係熱門汽車股中折讓最大股份。要咁睇，龍頭慶鈴升到現水位，同中航科工PE睇齊40倍水位，但NAV折讓得番28%，策略性股東唔嫌貴重有偈傾，睇落中航科工就平好多。
錢雋