今天是母親節，對於一群活在赤貧線下，吃盡苦頭的窮媽媽來說，感受特別深。蘋果日報慈善基金日前獲香港日航酒店贊助，招待十八名來自綜援或單親家庭的媽媽與子女免費享用自助餐，慶祝母親節，共享節日溫馨。
上周三（五月四日）中午，八個家庭一行十八人，浩浩蕩蕩抵達尖沙嘴香港日航酒店，各人皆懷着興奮心情，準備吃一頓由該酒店贊助的豐富自助午餐。
「囝囝你睇吓，真係有好多嘢食，有壽司、炸魚、牛扒，重有好多粉麵，你想食邊樣先，媽咪幫你攞啦！」自從去年六月和丈夫離婚後，阿麗便與四歲兒子偉仔相依為命，兩母子日前暫將煩惱拋諸腦後，一起出席聚餐活動。
今年是阿麗失婚後第一個母親節，她感觸良多。「老實講，呢幾年婚姻生活唔係咁開心，囝囝出世咁耐，我都冇慶祝過母親節，今年離咗婚，反而覺得輕鬆啲，今日重有咁多媽媽陪我一齊預祝母親節，我覺得好開心。」二十七歲的阿麗，離婚後靠綜援金生活，平日粗茶淡飯，當日遇上一席美食，兩母子皆吃得津津有味。
出席是次聚餐活動的孩子，沒有經濟能力購買禮物報答慈母劬勞，不過，孩子們的心思，卻逗得眾媽媽甜在心頭。「媽咪，我請你食雪糕吖！」六歲的阿儀，拿來自助餐桌上的軟雪糕，一口一口地餵其母親丘女士品嘗。
「𠵱家我都冇乜寄望，全副精神就放晒喺囡囡身上，只要佢聽聽話話，就係我最好嘅母親節禮物。」丘女士向記者道出不少單親媽媽的心底話。
年近四十歲的陸女士，擁有一個美滿家庭，卻因經濟困難令她透不過氣來。「呢兩年老公都冇工開，平日一家人都好少出街食飯，所以今日專程帶囝囝嚟見識一吓。」其十一歲兒子生仔向記者透露，他打算自製賀卡及紙花送給至愛的母親。
香港日航酒店公關經理陳杏明表示，該酒店一向支持慈善公益活動，適逢母親節，遂希望向一眾弱勢媽媽表達關懷之情。「母親節係歌頌媽媽嘅日子，不過，我哋知道，好多家庭困難嘅媽媽，都未必可以好好慶祝，所以酒店方面特別招待呢班媽媽同佢哋嘅小朋友享受一天，品嘗自助餐美食，同時感受社會人士嘅愛心關懷。」
當日出席活動的所有偉大媽媽，更獲贈康乃馨鮮花，令她們驚喜不已。
暖流熱線
電話：29908688
傳真：23702192
電郵：[email protected]
網址： http://www.charity.atnext.com