母親節正日，朝早同媽咪飲完早茶冇節目？不如趁住天氣未至酷熱，到郊外郊遊吓，近近哋揀大埔啦！無錯，大埔至出名一定係許願樹，奈何咁多年來日日受遊人「器重」，早幾個月終於不勝負荷生病了，斷臂不特止，重搞到元氣大傷！事隔幾個月，許願樹休養咗一排，同媽咪去林村視察吓佢最新情況，順道到附近天后廟上上香、參觀政府500萬豪裝嘅公廁，最後到海濱公園見識有大埔富良野之稱的花海，幫媽咪留倩影。
記者：梁彩燕
攝影：梁細權
Models：Nicky（TheGroup）、譚太
一落車過對面馬路已經係林村，冇乜人知道許願樹其實有兩棵，村口較大的是榕樹，閒閒哋都有百幾二百年樹齡，足足有成20呎高，求家宅、事業及健康最靈驗；而村內較細的則主攻祈求姻緣幸福。村口的許願樹飽歷風霜，最多人關注係前排弄得滿城風雨的「保樹行動」有咩最新進展，眼前的許願樹體質如何、休養生息會否好轉，確實無乜考究，但睇嚟樹身明顯經過清理，好似「精神」啲輕盈啲，以往掛滿身的寶牒只出現喺伸出鐵欄的樹幹上（恐怕只是遊人走法律罅，偷雞拋擲寶牒的「好事」），全樹又被鐵欄重重包圍，又由多條鋼筋支撐樹身，兼且豎起橫額標語，感覺有點「人工」，但當下的許願樹，顯然是難得的享受「無牒一身輕」的日子呢！
入廟睇古迹
專程去探許願樹，可多走兩步至天后廟，咪睇廟細細，其實係建於清朝乾隆年間，都算歷史悠久，係大埔最具規模的天后廟，廟內的洪鐘更鐫於1771年乾隆三十六年。唔拜神都可參觀吓歷史古迹。
超豪公廁耗資500萬
廟旁有一新建築物，外貌似園林入口，但原來只是公廁！其實新聞都講唔少，此乃政府為振興林村旅遊業，一擲500萬公帑所建的公廁，𠵱家廁內設施仍保持乾淨簇新，而且充滿清新花香（可以話香過自己屋企個廁所！），又放滿蘭花裝飾，咁揼本，可以話係誠意之作。
俯瞰吐露港 欣賞大埔富良野
以為去金紫荊已經好威？去埋香港回歸紀念塔重有話題！紀念塔坐落於大埔海濱公園，陪媽咪登上32.4米的瞭望塔頂，成22公頃的海濱公園同毗鄰的吐露港盡入眼簾。同時又可見識有「大埔富良野」之稱的扇形花海，遠看有點似彩虹，近看更可欣賞並認識各種色彩繽紛的時花。最後一站就係公園內的昆蟲屋，裏面展示咗各類昆蟲標本同模型，有得睇有得玩！
新街市名吃填肚
探完許願樹肚仔已經有點餓，出番市中心新街市（大埔綜合大樓）食平記麵家，點解要食？因為連星爺都專登去捧場喎，點可以唔試？而最大賣點係麵條全以手打方式製作，食落口感份外彈牙又滑口，無論蝦子麵、水餃麵、雲吞麵款款都咁掂。填飽肚重有少少位，可移玉步過幾個舖位食有記茶果或新鮮出爐砵仔糕當甜品，咁就Perfect啦！
水餃麵$15（前）?蝦子撈麵$20（後）
（平記麵家）
大埔鄉事會街8號大埔綜合大樓三樓CFS12
砵仔糕$3個
（有記茶果）
大埔鄉事會街8號大埔綜合大樓三樓CFS20
交通：
1.林村許願樹：大埔墟火車站乘64K巴士（$6.9）在放馬莆站下車。
2.新街市：大埔墟火車站往太和方向步行10分鐘，或於大埔墟火車站乘75K（$4.7）、71K（$3/$3.9）至大埔墟街市站下車。
3.海濱公園：大埔墟火車站乘275S（$4.3）至完善公園站下車（假日）。平日：大埔墟火車站乘K17（$2.5/$3.2）至總站，或享九廣鐵路免費轉乘優惠。