是日恒指埋單跌27點。中移動（941）除息0.46元，表面跌0.25元，實際升0.21元。唔計除息因素，恒指啱啱打和。
中移動C3599：中移動C輪隻隻升，熱門貨3651升13%，冷冷哋嘅3656，升夠20%。中移動已升破去年12月高位，接近去年3月高位28.10元，投機市場有所謂獲利回吐，中移動再升，需要好多彈藥，小心回吐。𠵱家高追中移動C輪，風險同回報唔多成比例，咪貪勝不知輸。
下一集，等中移動回吐，先至諗C輪，咪揀啲溢價相對較高嘅C輪，須知高回報嘅另1邊係高風險。
3599亦係熱門貨，7月初夠鐘，輪價26.5仙，溢價0.8%，槓桿率10.4倍（有效9.3倍），引伸波幅20.1%。吼位低收，等正股回落幾毫子先至做嘢。
中移動P輪3761：中移動如果唔跌，再升，手痕想做嘢，則吼P輪3761，博正股回頭。3761喺7月初夠鐘，輪價8.3仙，溢價5.6%，槓桿率33.1倍（有效12.3倍），引伸波幅26.7%。隻輪壽命唔算長，揸得太耐易輸溢價，上車只宜短炒，快打慢，可能賭3日已經算耐。
兗煤C輪3757：兗煤（1171）兩周前跌破10元後陰陰哋上，昨收10.75元，單日冇升跌。盤數見得人，估計仍有上升空間。
搵兗煤C輪埋手，有啲傷腦筋，勉強可揀3757，9月尾到期，輪價8仙，溢價6.8%，槓桿率13.4倍（有效7.4倍），引伸波幅28.4%。隻輪係仙輪，波動大，贏10%或輸10%，可能需時只係1個鐘頭。
章盛