早排因為中策（235）夥拍瑞力（491）入股銀河衛視，殼王動向再令市場注目，但奇怪係殼王一系股票近日跌得頗多，前日中策急跌，跟住噚日輪到德祥企業（372）同埋保華德祥（498）急挫。
大市呢排咁靜，有股票跌得急自然引起關注，經紀陳話，人地係受謠言所累，呢系公司冇事發生。至於謠言內容就言人人殊，總之係冇好嘢。
德祥企業昨日跌14.49％，收0.59元，成交股數2412萬股，金額1460萬元。至於保華德祥最低見過2.025元，收2.125元，跌10.53％，成交股數1952萬股，金額4184萬元。
雖然經紀陳話冇事發生，但兩股成交唔細，唔似係乾跌，莫非人心真係虛怯得咁交關？小初就覺得有啲嘢。
另外，吉利汽車（175）噚日下午停牌，話有個全面收購建議。經紀黃話，傳聞大股東吉利集團計劃買埋其他股東嘅股份。但汽車股近年一直偏軟，吉利股價較0.80元高位亦回落唔少，就算係全購，相信出價亦唔會高。
慕容小初