雖然NDS隻《任天狗》出咗成三個禮拜，不過愈搞愈鬧哄哄，唔單止機迷自發搞「狗聚」吹水一番，個個為換狗換Items，更頻頻到旺角、灣仔「等運到」！更甚者有人將Items擺上網拍賣搵真銀，Game舖老闆重話黃金周未完已經冇貨賣，呢隻熱狗認真巴閉！
記者：徐影龍
攝影：朱崇德
鳴謝：《FightClub》網站
《任天狗》最煞食地方，就係有十幾隻狗種同過百款Items，單打獨鬥好難儲得齊，最方便快捷就係不斷同人交換。不過好多Items出現率極低，執到有多都未必肯同其他人交換，所以有人效法OnlineGame咁，索性將自以為珍貴嘅Items放上Yahoo度拍賣！不過最正嘅方法係啟動通訊功能後，合埋部機仍可搜尋附近「狗主」，繼而自動換狗資料同道具，即係擺部機落袋到旺角走轉，閒閒哋換到4、5隻新狗同Items返嚟！網上更有機迷自稱因自動交換系統，而知道其中一個女仔狗主嘅《ICQ》號碼，最後重成功邀約去街街㖭！家陣呢種情形堪稱「𠝹狗大行動」，若你連《任天狗》係乜都唔知，就真係幾Out喇。
網址：www.fightclub.com.pk
20人狗聚狂換Items
早幾日，知名遊戲網站《FightClub》其中一位版主，就搞咗個狗主聚會，約喺旺角先達中心集合。未到兩點已經有十幾人報到，計埋臨時加入嘅超過二十人！個個未傾熟已急不及待換狗仔同禮物，幾乎逼爆先達門口位，以Games聚會嚟講，規模算唔細喇。
蒼月（《FightClub》版主之一）
《任天狗》喺《FightClub》入面嘅討論區相當之熱鬧，好多機迷都將自己養狗心得到罕有道具，放上網同大家分享，到目前為止，已累積到15版討論之數，雖然不及《DQ》、《FF》等二十幾頁討論，不過以手提機嚟講，算係史無前例咁勁！我自己買咗芝娃娃版，希望第二集推出時能加入配種系統，令養狗變化更大！
Nikaido
我買嘅係柴犬版，《任天狗》最吸引係狗仔動作同各式古靈精怪Items。交換系統的確一絕，一個人根本冇可能儲得齊所有嘢，今次聚會俾我換到隻隱藏狗積羅素，真係好開心，我會畀心機訓練佢成材！
Wenjoe
好多人話儲錢難，其實識得將幾隻狗仔不停咁推去玩障礙賽，碰啱表現好就Save，一失手就Reset嚟過，幾百萬真係唔難搵！家陣我買晒屋都重有成二千萬剩，反而努力緊儲狗仔同罕有Items。
張氏夫婦
之前聽人講話先達好易換到狗仔，所以假日專登同仔仔囡囡落嚟試吓，發覺原來真係咁易喎！我好鼓勵仔囡玩呢隻Game，可以培養佢哋嘅愛心同責任感，Message非常正面，好過玩打打殺殺嘅OnlineGame啦！
Yuki
本來我都唔鍾意打機嘅，偶然玩過朋友嘅《任天狗》後，真係深深咁愛上佢！事關啲狗仔真係好得意好Cutie，好多指令佢哋都聽得明，有時重幫我贏唔少獎金返嚟㖭！𠵱家最想攞獅子頭，好想將導盲犬變成獅子！
肥瘦編輯公園被𠝹實錄
話說本版一肥一瘦2位編輯，啱啱做完嘢諗住喺公園唞唞，繼而好有默契地齊齊攞部NDS出嚟「𠝹狗」。點知唔夠一分鐘，已經有個女仔走埋嚟趁熱鬧，原來佢都玩緊《任天狗》，重即時同2位編輯互相分享養狗心得同交換吓禮物咁，氣氛相當之融洽輕鬆，同行攝影師重好醒目地拎起相機，拍低呢幕「被𠝹實錄」。估唔到《任天狗》魅力可打破男女隔膜，令2位編輯一嘗被女仔主動撩傾偈嘅滋味。
珍貴Items曝光
咪以為攞上Yahoo度拍賣嘅紅、綠帽好珍貴，以下介紹嘅Items先係罕見極品，莫講話隨街執唔到，好多人根本連見都未見過，若咁好彩俾你執到，千祈唔好拎去賣，事關大把人爭住同你換Items！
宇宙空間
繼桌上空間後出現嘅屋，設計以太空基地為主，小狗奔跑及玩耍時更恍如置身太空，相當之頂癮！飼主分達12,000就會出現，可惜售價三千萬，真係有排儲錢。
宇宙人
相信屬畀狗仔玩嘅布公仔類，入手條件未明，估計起碼要擁有宇宙空間先有機會出現。
MarioKart
可控制嘅遙控車仔，暫只知有Mario、Peach公主同龍龜，一架都難執，想儲齊一套更難。
蛋糕帽
成個蛋糕擺喺狗頭度Fing吓Fing吓，趣致到爆，估計踏正機主生日就有機會執到。
小瑪琍
狗仔、熊仔布偶好易執，不過呢款小瑪琍就較為罕有。
獅子頭
獅子頭可算係帽類最頂癮嘅Items，跟拉布拉多可謂絕配！
隱藏狗
隱藏嘅積羅素為第16款狗種，以速度及體力見稱，初出現即驚為天人，個個爭住想換。
愛犬狀態備忘錄
想隻狗仔生生性性，幫你贏多啲比賽獎金，就要時刻昅實佢嘅生理狀態，例如肚餓、口渴你都要識做。狗毛都好重要，每次比賽前幫佢「梳靚𢱑正」表現肯定好得多！唔識睇日文？今日就登個狗仔狀態表，畀大家貼喺NDS左上方，睇住「貓紙」就唔怕搞錯啦！
