亞視搞咗個節目《一舉成名》，初時諗住同無綫《殘酷一叮》鬥過，噚日最新消息係《一》會喺聽晚八點四十分首播，對撼《繼續無敵獎門人》。
亞視噚日重安排喻可欣到深圳，考驗有山西劉德華之稱嘅參賽者賀剛，不過喻可欣嘅風騷態度似乎嚇怕呢位只有二十三歲嘅後生仔，話時話佢個側面都有九成似劉德華㗎，影相時大家都叫佢哋親密啲，男嘅就俾女嘅風韻嚇親，尷尷尬尬，多番要求下山西劉德華先肯係咁意親一親喻可欣面頰，之後賀剛情深款款咁唱出《一起走過的日子》同《我和我追逐的夢》。
喻可欣又幫賀剛修改眼眉毛，搞到佢郁都唔敢郁，最後喻可欣為佢評分，表情同外形激似度畀三分滿分，歌聲同談吐激似度就有兩分，喻可欣話：「佢側面好似劉德華，尤其鼻哥同啲小動作，畀佢有九十九分，差嗰一分係人始終冇可能一樣，佢斯文啲。」
見到同舊愛有九成相似嘅人喺側邊，應該會有啲心跳回憶啩，喻可欣話：「今日係嚟做老師，好好玩。」雖然喻可欣咁鬼主動又唔怕醜，但賀剛話：「我當佢係長輩，大姐一樣看待。」
F4前晚喺西貢同古天樂拍百事廣告，噚日F4返台灣，佢哋每次喺機場出現都好哄動，噚日都唔例外，有成五十幾個fans送機，馮仁昭見言承旭心情勁靚同fans握手，但唔知點解吳建豪就燶口燶面，好似成村人得罪佢咁。
蔡依林（Jolin）噚日喺台灣一間中學演講時，大爆自己高中時嘅一段「綿羊仔」戀情，Jolin話：「對象是附近的松山高中男生，他放學都會騎摩托車來載我，到現在還很想再見到他。」Jolin重鼓勵學生們談戀愛，話功課都會進步，唔知Jolin讀書成績好唔好呢？
劉德華同陳寶珠俾電台節目選為「母親眼中最孝順男女藝人」，寶珠姐噚日接受電話訪問時話今年母親節都會一家人食飯慶祝，但係食完飯之後就一定要陪媽媽打牌。寶珠姐又話媽媽早前因為氣管收縮而入咗醫院一個星期。至於仔仔楊天經，就每逢節日都會買禮物同埋寫一張卡畀佢咁話。
林曉峰、錢嘉樂、曾志偉同李珊珊噚日喺機場出現，馮仁昭問佢哋去邊，志偉就冇厘正經咁話：「去街囉！」冇耐李麗珍亦都到達機場，原來佢係同志偉佢哋一齊去美國登台，馮仁昭睇佢哋呢個陣容，都應該係拉隊去美國做《獎門人》啦！
方力申前晚喺銅鑼灣出席代言嘅太陽眼鏡發布會，佢戴住新款太陽鏡行騷出場同介紹運動員時，現場燈光突然熄咗幾秒鐘，好彩及時搶修成功，發布會先可以繼續舉行。事後方力申話：「好快冇事啦，好彩有森美喺度做司儀，佢執生好叻。」
