八方噚日睇交易所嘅股權變動資料，發現星島集團報章業務嘅行政總裁盧永雄，早兩日獲得四千三百萬股認股權。其中三千六百萬股可以喺下年五月四日開始，喺十年內行使，每股行使價三毫八仙半；另外七百萬股舊年十月十三日開始，有十年行使期，每股行使價七毫一仙。
兩批認股權行使價都高過噚日星島收市價三毫七仙半。
睇嚟盧總未來要更努力，做好啲成績（上個月尾星島公布去年業績跌咗六成二），股價水漲船高，高過行使價，咁第日賣股，報界就又多個千萬富翁喇！
傳真︰2623-9278
電郵︰[email protected]